Ami tabata indirektamente enbolbí den pelea di gai. Mi no a yega di mira un pelea di gai nunka i mi no a anhelá tampoko pa mira un pelea di gai. Sí mi a papia ku diferente hende tokante pelea di gai. Loke mi no ta komprondé ta kon por ta hustifiká e pelea di gai, komo un deporte, komo atrakshon turístiko. Kòrsou,ounke e pelea di gai ta prohibí,tabatin i segun diferente hende te ainda tin pelea di gai ta tuma lugá.

Pelea di gai na Aruba.

… ‘e tribuna ta yena cu varios caranan. Caranan desconoci, pero tambe caranan den nos comunidad. Un maestro di scol ta hasi un pedido na bar, mientras cu e abogado ta cumpra un cuminda na e cushina crioyo. E comerciante ta combersa cu fanaticonan cu ta participa den un wega di placa. Mas den distancia un polis ta comparti un momento cu su gai prome e drenta e arena di pelea. Riba e pleno dia aki, e persona nan presente ta pone edad, clase social y cualkier otro diferencia un banda y uni pasobra riba e atardi aki tur hende ta presente pa e mesun motibo. Nan tur ta comparti e passion pa e deporte di gayero…’(Pelea di gai na Aruba,Historia,Tradicion,Cultura,Deporte. M.F. (Mayon) Arends).

Influensia di spañónan a hasi su entrada na Aruba, pero pa straño ku ta parse no mesun fuerte na Kòrsou.Pelea di gai ta un tradishon di e temporada ei. Tin diferente klup i kriadera di gai pa pelea na Aruba. Aruba tin diferente klup di gai ku ta aktivo segun M.F. Arends, El Vencedor, Los Amigos i Savaneta, i sigur 5 biaha pa aña tin aktividat sea nashonal òf internashonal di pelea di gai. Parse ku St. Maarten tambe tin aktividat di pelea di gai ainda.

Na México, mi a bishitá un atardi di toriamentu. Mi a mira kon e torero ta hinka su spada den kurpa di e toro. Mi a mira sanger spreit for di kurpa di e toro i kon e bestia tabata kore su kareda final, promé ku e dal abou i muri, i kon ta bin lastra e bestia saka for di tereno i kon e torero ta hisa su mannan den forma di viktoria i kon públiko tabata aploudí sin stòp. E toro tabata den un desbentaha inkreibel, pasobra, banda di e torero tabatin, matadó ku pikadó tambe ku kada un tabatin nan parti den e wega pa kaba ku e toro su bida. Mi a sali for di stadion i a hura ku hamas lo mi presensia un otro espektákulo di toriamentu.

Mi a kòmbersá ku algun hende aki na Kòrsou, ku igual ku mi, pero den e kaso aki tratando di pelea di gai, a hura ku hamas nan lo presensia un pelea di gai. Nan a konta mi nan eksperensia di pelea di gai ku nan a presensia na Banda Ariba. Nan anfitrion a garantisá nan ku nan ta bai presensia un espektákulo emoshonante. Nan a konta nan di antemano, ku pelea di gai no ta legal i ku no ta permití pelea di gai na Kòrsou. Pero kuriosidat a pone ku nan a disidí di bai presensia e evento tòg.

Eksperensia pelea di gai na Kòrsou.

“Nos a bai sinta un tiki mas leu for di área, kaminda e pelea di gai tabata tuma lugá. Un lugá ku a duna un bista manera ta den un sirko bo ta, ku banki di palu. Dilanti di e lugá tabatin algun outo karu parker. Nos anfitrion a konta nos ku eseinan tabata outo di hende ku basta sèn i ku tabata tei, pa pusta plaka riba un di e gainan. Tabatin un públiko moderá presente. Nos anfitrion a bai kumpra algu di bebe pa nos, na un bar ku tabata hopi bon surtí i anekso tabatin un kushina tambe. Nos a mira dos doño di gai, kada un ku nan gai den nan man i tambe un rèfri ku mester a guia e pelea. Di antemano nos anfitrion a konta nos, ku e sistema ta, ku e gai ku maltratá e otro gai mas tantu, òf mata e otro gai, ta e ganadó. Pa hasi e pelea èkstra interesante, sa pone spor falsu òf blet na pata di e gainan, ya asina nan por maltratá otro mas mihó. Ora pelea mes a kuminsá, públiko a manera lanta for di soño i a kuminsá grita pa e gai riba kua nan a pusta. Tabata un bista di horor, gainan tur na sanger i kasi siegu, ya ku nan a pik otro saka otro su wowo. Mei mei di e pelea, nos a disidí di bandoná e lugá, sin por a komprondé kiko ta asina sensashonal na e evento aki i kon hende por a sinta i dibertí, mirando e maltrato di bestia aki ta tuma lugá. Na ningun manera por kompará e aktividat aki ku kareda di kabai òf di kachó, kaminda den e karedanan menshoná ta trata di prestashon físiko di e bestianan i no ta trata di kaba ku otro, miéntras den pelea di gai esei si ta e kaso. I mas tristu ainda, ku nos komo hende ta hasi uso di maltrato di e bestianan, pa pusta plaka riba e evento asina kruel”.
Mi sa ku despues di a presensiá e evento akí, e persona aki a skibi un remitido kontra pelea di gai den un korant lokal.

Na 1975 “Stichting Dierenbescherming” a saka un artíkulo kontra di e abusu di animal akí. Nan a boga den artíkulo, pa nunka duna pèrmit pa organisá pelea di gai na Kòrsou. Ounke, un biaha mas mi kier señalá, ku ainda tin pelea di gai ta tuma lugá na Kòrsou.

Na 1970 Gobièrnu Sentral a trata e lei “Landsverordening Hazardspelen”, i despues di bastante diskushon a aprobá e lei modifiká den sentido, ku Minister di Hustisia por duna pèrmit pa organisashon di e.o pelea di gai na sierto lokalidat. A akseptá e lei akí ku 20 voto na fabor i un kontra. Esun ku a vota kontra e tempu ei, tabata Stanley Brown (Stanley abo si ta gai¹Abo si ta bon! Sapaté, na bo sapatu! Reginald V. Römer). Su splikashon tabata: ” mi ta haña  pelea di gai askeroso i no ta kuadra komo aktividat pa promové nos kultura. Mi no por komprondé kon un señora manera Lucina Da Costa Gomez por vota na fabor di algu asina. Ku Godett i Monte ta vota na fabor ta nan asuntu, ami lo no bisa “si” sin mas pasobra nos partido ta forma koalishon. Mi ta vota komo representante di pueblo segun mi konsenshi”.

Mi embolbimentu den pelea di gai tabata, ora ku den dékada 90, mi a yama polis pa un aktividat di pelea di gai den Banda Ariba. Polis a presentá i e organisadó a hañ’é ta: Kore kabes di gai²hañ’é den pura. Sapaté, na bo sapatu! Reginald V. Römer, pasobra e no tabatin ningun pèrmit.