Final di ougùstùs pa kuminsamentu di sèptèmber 2024 Kòrsou un biaha mas tabata den krísis di gobernashon. Pa di tantísimo biaha den último dékadanan a resultá ku e maldito fenómeno di ‘goberná ku koalishon’ ta un sistema ku no ta kuadra mas ku nos realidat polítiko, kaminda mester tene kuenta ku asina tantu interes di persona i partido ku ta kasi imposibel garantisá kontinuidat di gobernashon i stabilidat polítiko. Komo pais nos no por permití nos mes e luho di pasa periodonan largu sin un gobernashon ku ta funshoná i ku mester tuma desishon nesesario pa hiba nos pais dilanti.
Manera lei ta preskribí mester bai bèk serka Gobernador komo hefe di estado kende despues di skucha tur esnan envolví, por sea manda Parlamento kas òf laga tene elekshon nobo. Òf e por purba un biaha mas pa nombra sea un informadó òf un formadó ku mester trata di forma un gobièrnu ku por konta ku un mayoria responsabel. Den e último kaso, esaki no tabata nesesario, ya ku a restrukturá gobièrnu, ku yudansa di dos independiente i un frakshon di un persona.
Mi a bai tira un bista den pasado i mi mester bisa ku mi a haña un par di dato mashá interesante i chistoso ku a pasa i ku mi keérelatá den e artíkulo akí.

Un di e ekspreshonnan ku bo tabata tende hopi ta, ku na un dado momento, bo ta haña bo ta drenta ku un partido, pero bo no tin gana di hasi esei, pero bo no tin gana di keda afó tampoko, anto e ora ei bo no ta drenta e koalishon “con amore”.

Na sèptèmber 1959, lider di frakshon di NVP C. Cathalina, konosí komo Noble, ta bòltu di NVP pa DP i gobièrnu ta kambia i bira DP-KVP. E bòltumentu akí tabata históriko, ya komo Sr. Cathalina tabata lider di frakshon di Partido Nashonal tantu na nivel insular komo sentral.Den e periodo aki no tabata eksistí ainda e reglamentu den Konseho Insular ku un gobièrnu mester baha ora e no tin konfiansa mas den Konseho Insular. E periodo akí tabata unu remarkabel. (Historia Polítiko di Kòrsou 1951 – 1967, dr. Gilbert Cijntje i drs. Martha van Bergen).
Gobernashon Sentral tabatin sosten di DP, i NVP tabata forma parti di oposishon. Na nivel insular e dos partidonan akí tabata den gobièrnu huntu i tabata dirigí Kòrsou. Un situashon ku na 1959 ta finalisá i ta kambia totalmente.  Dia 30 di yanüari 1960 Gobièrnu di Reino ta instituí un Algemene Maatregel van Rijksbestuur, proponé pa Gobièrnu Antiano bou di liderato di E. Joncheer.

Riba 24 di yüli 1964 Sr.  A. Moeniralam ta bandoná fila di NVP i ta djòin DP  i ta pasa mésun dia ei di un empleado na nivel insular komo Commies pa un empleado den servisio di Gobièrnu Sentral (lesa Gobièrnu Jonckheer) den e funshon ku e tabata anhelá Hoofd Commies ( Amigoe di Curaçao, 25 di yüli 1964).

Na novèmber 1965 Sr. E. Jesurun ta sali ofisial for di NVP entregando su asiento. Un asiento sumamente klave, pasobra na e momentu ei e balansa den parlamento tabata di 11-10.

Ta kla den nos memoria tambe, kon na ougùstùs 1980, de Nacht van Cijntje, a marka regreso di Sra Maria Liberia Peters den gobièrnu despues di su sklamashon: ‘I shall return’.

Yüni 1984 tabata otro kaida di Gobièrnu, e biaha aki pa motibu di un supuesto supsidio na un delegashon di atletismo. Gobièrnu Sentral a kai, ora ku MAN a kibra ku Roy Markes, Presidente di Staten. MAN a sali di 6 asiento i bai 5 dor di saka Roy Markes for di partido. Na sèptèmber 1984, e partido a keda ku 4 asiento, ora ku a disidí di raya Victor Minguel, ku no kier a entregá su asiento, pa asina partido reorganisá miembronan den Staten.

Edsel ‘Papi’ Jesurun e tempu ei komo lider di URA a yega di bisa: “Ku bo mester realisá, ku aki na Kòrsou, bo por lanta mainta o bai drumi anochi sin ku bo ta gobernante mas. Papi Jesurun no a eksagerá i polítika kurasoleño a demostrá i ta keda demostrá ku prinsipionan fundamental ta un di e kriterionan ménos importante pa nos polítikonan. E último desaroyonan polítiko a demostrá ku nos ta leu di alkansá madures polítiko.

Den edishon di yanüari 1988 di La Prensa, Dori Maco a atvertí Gabinete Martina IV pa wak pa Papa Godett no nister. E tempu ei via di telegram Papa Godett a pone e koalishon na altura ku nan, FOL, no por bai di akuerdo ku e asina yamá “Volume beleid” pa retirá un kantidat di ámtenar, i Gobièrnu na Skalo a kai i tabatin konsekuensia riba nivel sentral tambe. Esaki mesora a trese mashá komentario den pueblo ku: Papa a nister. Mesora Shon Colá a laga imaginashon traha i e komposishon Papa A Nister a nase i a bira un éksito grandi.

Anékdotanan Parlamentario

Shon Bubu Booi kier a hasi interesante den Staten e kier a bisa: ik ken de voorgeschiedenis niet van dit stuk. El a bisa: ‘Mijnheer de Voorzitter, ik ken de prehistorie niet van dit stuk’. Dip no a pèrdè pa gana i a lanta bisa ‘Mijnheer de Voorzitter het zal me niet verwonderen als we straks bezoek krijgen van de dinosaurussen’. (Historia Polítiko di Kòrsou 1951 – 1967, dr. Gilbert Cijntje i drs. Martha van Bergen).

Rufus McWilliam ta konta: Shaki Debrot, I.C. Debrot di KVP, ku tabata minister di Finansa ta lanta bisa despues ku su tata ( E.Plantsz)  a kaba di papia: ‘Mijnheer de Voorzitter ik zonet de redevoering gevolgd, ik heb het eigenlijk niet kunnen volgen, maar er is een Spaans spreekwoord dat zegt ‘Los perros ladran pero la caravana pasa’. Plantsz a lanta para mesora i a kontestá”Mijnheer de Voorzitter ik ben de caravan’. (Historia Polítiko di Kòrsou 1951 – 1967, dr. Gilbert Cijntje i drs. Martha van Bergen).

Ali-Alam Moeniralam di PNP tabata konosí komo un miembro ku chikí chikí tabata trata na imitá Dòktor. Nan tin e mesun estatura. Te einan sinembargo. E a kria un barba ku no por a kompetí ku esun di Dòktor. E no tabatin e stail di Dòktor ora esaki tabata pasa man den e barba. Tambe el a start poko poko papia i prinsipalmente tene diskurso largu manera Dòktor. Den un reunion di Konseho insular na komienso di novèmber 1964. Moeniralam tabata papia i papia sin límite di tempu (i tabata konosí ku Gezaghèber Gorsira no tabata skòrs reunion) imitando Dòktor (ku e dia ei no a tuma palabra). Na dado momento kolega di Moenieralam, E. Voges su kana a yena i e a grita: „Mijnheer de voorzitter, als u hem nu zijn mond niet smoert, dan zal ik hem dichtslaan!”  Esaki a trese konsternashon den sala i miembronan di DP, mirando un oportunidat polítiko, a defendé Moenieralam.

Den un kaso mas resien Parlamentario Sr. Rosaria a haña palabra despues di Schotte ku a gaña un skat di kos den kuadro di ekonomia di nos pais. Rosaria a lanta para, sende su mikrofon i a bisa: Sr Presidente, no tuma mi na malu, pero mi ta bai tuma un momento promé ku mi start mi diskurso. Mi ke warda e huma di mentira den e sala aki baha poko. A pasa 20 sekònde di silensio, miéntras e mike tabata sendé. Frakshon di MFK tabata furioso, pero no por a intervení pasobra Sr. Rosaria tabata na palabra I e mike tabata sendé. Nan mester a warda 30 minüt pa por a reakshoná.