Un karikatura ta un refleho humorístiko di un persona òf situashon òf di komportashon. Den e karikatura ta enfatisá e aspektonan mas remarkabel di e persona òf situashon deskribí i asta eksagerá esaki. Ta usa karikatura pa pone hende hari, pa kritiká, hasi chèrchi di un situashon òf pa pone atenshon riba un situashon ménos deseabel.

Karikatura ta usá rònt mundu, tambe na Kòrsou. Manera tambú i banderita den nos kultura ta medio pa kritiká i pone atenshon na situashonnan den nos komunidat, meskos ta e kaso ku karikatura.

Pa medio di karikatura tambe por konosé nos historia. Via di e karikatura ‘pueblo’ tabata pone esnan responsabel na altura di kiko ta biba den komunidat i unda e sapatu ta primi. Spesialmente situashonnan polítiko sosial ménos deseabel tabata bin dilanti.

Bentaha di e karikatura ta ku na un manera kòrtiku i konsiso e ta tira lus riba susesonan, sin ku bo mester bai lesa kantidat grandi di teksto pa por komprondé e situashon.

Den Archivo Nashonal tin un kolekshon grandi di korant i revista wardá tokante karikatura na Kòrsou. Nos konosé figuranan di karikatura manera Korsowito, Dori Maco (Den mi Awa), Monchi ku Tonchi i Micho den Bògt ku tabata sali den nos korantnan.

Un di e karikaturanan di mas bieu ku nos konosé ta e figura di Azijn Banana ku tabata sali den e revista Lorito Real. Lorito Real tabata un revista humorístiko ku tabata sali semanalmente durante añanan 1948 – 1958. E editor mes a yama Lorito Real e “semanario pa mucha ku tin mas ku 21 aña”.

E outor: Oscar Enau van Kampen tabata alumno di Hendrikschool i huntu ku Efrain Jonckheer tabatin e redakshon di e korant di skol na nan enkargo. Oscar van Kampen tabatin un talento èkstra ordinario pa pinta i skibi. Lorito Real ta skibí na dos idioma, papiamentu i ulandes. E revista tabata masha bon lesá den tur gremio di Kòrsou i ta kosta dies plaka.

Oscar van Kampen no tabatin e intenshon di produsí un revista literario, ounke ku ratu ratu ta sali un poema den e semanario, i asina mes tabata den forma satíriko òf parodia. Popularidat di e revista tabata masha grandi mes i muestra di esei ta, ku tabatin diferente hende ku a purba kopia e idea di Oscar van Kampen, pero sin éksito. Na 1950 a sali Chaparrin i na 1951 e Sapu Abuzador i tambe e Palabrua Redadó. Ningun a dura mes largu ku Lorito Real òf tabatin e éksito di Lorito Real.

Azijn Banana tabata un figura masha remarkabel. E tabata krítiko, ku hopi atenshon pa tur loke tabata pasa rònt di dje. Serka dje e siudadano tabata yega ku nan kehonan. Ku su oreanan enorme, e tabata kla pa duna oido na kualkier persona ku aserk’é ku kualke komentario o situashon fèrfelu ku tabata tuma lugá den nos komunidat. Su gritu klásiko i desesperá ora e tuma nota di un situashon indeseabel tabata: ”Ai ai ai ta com t’asina”. (Mi no por a saka afó, dikon ta “com i no con). Esaki tabata resoná den kombinashon ku un salto den laira.

Azijn Banana tabata un persona ku atenshon i apresio pa nos beyesanan femenino. Semper e tabatin un palabra bunita pa e sekso opuesto. Den e aspekto akí tambe su komportashon tabata pekuliar. Na momentu ku e situashon ku e ta den òf tende di dje pon’é sinti su mes asina desesperá e tabata tira un salto riba kualke persona di sekso femenino den su besindario, loke semper tabata motibu pa reakshon.

Den 2012 Archivo Nashonal a dediká atenshon spesial na e figura di Azijn Banana durante siman di Kultura. Miéntras tantu 75 aña a pasa pero Azijn Banana a keda un personahe menshoná den nos komunidat. Nos sa di siudadanonan di edat ku ta karga e beinam akí. Tambe na emisoranan lokal, tantu Curom komo Hoyer sierto lokutornan ta menshoná e nòmber akí regularmente. Dunando kontenido na nos tarea pa promové konosementu di nos historia, nos ke laga pueblo, spesialmente esnan mayor rekordá i esnan mas hóben sera konosí ku un figura históriko klásiko di nos kultura.

Nada no tabata skapa atenshon o orea di Azijntjes (esaki tabata un nòmber di kariño ku hopi dama tabatin p’e). Burokrasia i mal servisio na departamentonan di gobièrnu el a denominá komo AMBTENARITIS. I awe 75 aña despues lo el a sigui kritiká.

E situashon den kuido tampoko tabata kos di kanta makamba, segun nos amigu Azijn. Hopi biaha nan tabata mand’é “di Ponsio pa Pilato”.

Keda pendiente pa e di dos parti di Azijn Banana.