Pasado realmente no ta muri, di un òf otro manera, bo ta mira resurgimentu di pasado. Tuma por ehèmpel Drive In teater. Durante pandemia di COVID-19, bo por a mira drive-in teater krese na diferente parti di Merka. Ta un sistema, pa huntu mira pelíkula i tòg mantené distansia sosial. Famianan ku kier a sali un ratu for di kas i tin un bida tòg “kasi” normal a rebibá e pasa tempu Merikano akí ku plaser. Durante pandemia di COVID-19, diferente Drive In teater a habri nan porta na Merka i Aruba a konosé, renasementu di nan Drive In teater.

Di akuerdo ku New York Film Academy e promé Drive In teater a habri na 1910 na New Jersey pero ta dura te 1965, ku Recreation and Amusent & Co, di Max de Castro, Albert Pijper i Frank da Costa Gomez ta pone e promé Drive-In teater na Kòrsou (kapasidat pa 500 outo).

Un dékada despues, Angel Job ta habri su Golden Drive In Teater, kaminda awe ta Festival Center(e kapasidat di outo akinan ta mas grandi). E idea di por a bai sine ku henter famia sin hasi masha kos a bira popular aki na Kòrsou tambe. Spesialmente hóbennan ta gusta e idea akí, paso nan por a sinta frei den outo sin interupshon, alomenos esei nan a kere.

Nos ta tin un grupo di amigu: Elco, Roy, Sheila, Lydia, Lena, Boboyd, Linchi, Eric i nos ta yena e stationwagen di Fandjua yen yen (pèrta riba otro) i bai wak sine na Groot Davelaar. Ta tin biaha, ora ta kobra pa persona, nos ta skonde hende den baul di outo i unabes drenta paden, nan ta sali for di baul i djòin nos den outo. Bo ta drenta bai paden ku bo outo i na un lugá pa parker, bo ta para bo outo i bo ta kologá e spiker na porta di e outo pa zonido. Klaro ku nos no ta papia ni di zonido stéreo, te pa nos papia di “surround sound”. Si bo ta tin bo frei den outo anto ta tin muchu hende den outo, bo ta sali bai sinta riba e patio, pegá ku kaminda ta bende kos, aki tin un sitio pa esnan ku kier bai sinta den airu liber kaminda bo ta tin un tiki mas privasidat i disfrutá di otro i di e pelíkula. Te na ora bo ta fèrfelá bo mes den outo, bo ta sali bai tira un tèk i chèk e otro parehanan den outo, ku ta den akshon ku nan esenanan amoroso i asina stroba nan den nan aktividat amoroso.

Bisiñanan den akshon

E Drive In teaternan a haña basta krítika i ta tin asta èkstra restrikshon pa pelíkulanan ku mester pasa den drive-in teater. “Komishon di kùr” ta èkstra severo ku kòntròl riba e pelíkulanan akí. E petishon aki a bin di parti di gezaghèber Kibbelaar. Aparentemente komishon di kùr pelíkula, tabata aprobá tur pelíkula ku pasa “screening” na Hulanda aki na Kòrsou tambe. Gezaghèber Kibbelaar a pidi pa èkstra atenshon pa pelíkulanan di sèks ku ta pasa na drive-in teater (airu liber), ya ku grupo di hóben ta forma na waya pafó di e teater i ta praktiká loke nan ta mira riba pantaya, ei fo kantu di waya.

Tantu polis komo habitantenan di e bario tabata keha di e kasonan. Por sierto ku yegada di e Drive In teater den Groot Davelaar no a bai sin protesta di siudadanonan ku a mira ku yegada di e teater akí den nan bario, un menasa serio pa nan trankilidat i privasidat. Problemanan a eskalá, na momento ku e teaternan a kuminsá ku nan eksitoso “midnight show”, ku pa gran parti ta konsistí di pelíkulanan di sèks.

Ambos Drive In teater ta tin diferente kampaña pa atraé mas hende (outo) den nan negoshi. Despues di tempu, ku terenonan birando mas karu, yegada di televishon di koló, yegada di video recorder i hürmentu di video, teaternan a haña èrko, naturalesa ku no ta kooperá (áwaseru ku ta sòru pa kanselashon) i tambe pa motibu di vandalismo, Drive In teater a kai na popularidat. Ta tin un temporada ku no ta tin teater di sine na Kòrsou i ta despues di tempu, nos a haña un teater di sine den ITC i despues The Movies a habri su porta den Punda.

Recreation and Amusent & Co a bende nan Drive In ku otro hende i despues a sera su porta i famia Job a traspasá nan Drive In teater pa Asosashon di Músiko i Artista di Kòrsou ku a kombertí e teater aki den un sentro pa festival i pa hopi evento mas.