Un brindo, un ‘toast” manera tabata bisa ántes, ora ta tira dos tres palabra na okashon di un aktividat. Te ainda e kustumber akí ta vigente i na diferente okashon, nos ta haña un òf otro persona ku ta tira un diskurso. Cornelis Raphaela, a skirbi tres buki chikí tokante brindo (aña mas o ménos 60 i e último ku el a saka (di tres edishon) na aña 1977) .

Mi ta imaginá mi ku su brindo pa 2025 lo tabata: “Apreciable Lectornan: Anja Nobo, tur cos nobo. Mi ta desea cu tur mi Apreciable Lectornan lo pone nan intencion instructivo den marcha pa engrandicimiento di nos dushi Papiamentu. Sea consciente, ta nos mes mester grandeza cu nos klompi di oro. Cu esaki mi kier hala atencion di tur Escritornan yiu di Corsow ta duna nan cooperacion pa un bon entendimiento instructivo y progresivo. Tal peticion ariba menshon ta pa trece algun bukinan instructivo riba nos tereno di sijanza manera esnan di Europa. Nos por haci hopi, basta si nos pone forza di boluntad den marcha. Cu Dios nos dilanti nos mester triunfa.”
He Dicho,
C. M. Raphaela

Na kuminsamentu di siglo 19 tabatin algun eskritor ku a kuminsá skirbi, mayoria di nan a kuminsá skirbi pa korantnan lokal (La Cruz i La Union) ku tabata bou di patrosinio katóliko. Klaro ku nan kontenido tabata segun reglanan di katolisismo. Nan tabata produsí nan buki i hopi di nan tabata hasi esaki na kas i tabata bende nan bukinan di kas pa kas. E temporada ei, e reseña ku nan tabata haña no tabata mashá alentador. Eskritornan manera Tuyuchi (A.E. Leito), Wilfrido Ortega, Amador Nita, Guillermo Rosario, Manuel Fraai i Cornelis Raphaela.

Cornelis Raphaela no tabata kontá den e eskritornan kurasoleño ku tabata gosa di simpatia komo eskritor. Den “Autonoom – Nederlandstalige literatuur op de Antillen” di drs. C.G.M. Smit + W.F. Heuvel, nan ta deskribí Cornelis Raphaela su arte di skirbi, komo arte di primitivonan.

Cornelis Raphaela tabata skirbi brindo pa diferente okashon, kasamentu, hasimentu di aña, boutismo, brindo pa deporte, brindo speshal pa Dominó Sport Club, manera e mes a yama: algu pa ora di morto i petishon speshal na su patriotanan.

Manera Cornelis Raphaela a skirbi den su prólogo: “Es buki chikitu aki titulá Brindonan na Papiamentu ta un trabao haci ku intencion firme pa juda tur simpatizadornan di inteligencia moderno, cu ta gusta demonstra nan capacidad technico na oranan di casamentu, hacimentu di anja, y na ora di morto; ta un plazer sincero pa mi, duna mi co-operacion cultural aki, na un manera educativo y instructivo; my hondo deseo ta, di mira tur jiunan di Corsouw lamtá, y no na sonjo, mi kier mira nos tur den es edificio di union inquebrantable, pa nos tambe aki na Corsouw, un isla chikitu, camina tin diferente pro contactonan di capacidad, di munstra nos capacidad na maneranan technico cu nos por.”

Algun brindo for di su bukinan: Un brindo pa un amiga. Mi ta skirbi esaki manera nan a keda publiká den su bukinan:
“Mi amiga consehera:
Den tur contratiemponan bo a concentra medidanan sanativo pa sana mi heridanan, awe cu Dios a duna bo un anja mas di bida lo mi expresa mi deseonan en contacto cu interesnan di futuro, mi ta desea cu experiencia lo ser bo gia den tur obstábulonan ofensivo, cu lo bo por permanece cerca experiencia pa e uni bo cu un feliidad duradero cu lo brilla bo camino igual cu e lampara y pa semper bo sigi den bon camino y mira tambe e probecho. He dicho.”

“Algu pa hora di Morto: Triste Familia
Awe es sala aki a yena cu tristeza, ocasioná pa es amigo di eternidat, ta un separacion eterno cu Dios a destiná pa cada un di nos; nos tur mester conforma na es yegada triste y inevitable; mi ta condolá e familia y consehé di ser consciente cu accion di nos Ser Supremo pasobra E sá kiko e mester haci y deshaci. Sea conforme.”

“Brindo pa Casamentu: Respetable Pareha, Damas y Caballeros:
Dos curazonnan den un solo sinceridad
A uni awe den un conformidad
I mi ta desea cu luz di claridad
Lo luza nan camino di berdad.

Interesnan na gran escala di nan amor
Lo brota den nan bunita sala
Mandá pa Dios di Altisimo
Cu lo keda garantisimo.

Paz y unión na nan fabor
I sinceridad di nan amor
Lo forma un base di honor
Pa hiba un bida perfecto di balor. He dicho.”

Mi no sa dikon ku ora mi lesa brindonan di Cornelis Raphaela, mi ta kòrda riba Elis Juliana su obra Palu Kalòis(Wazo riba ròndu).

Na Boneiru, Octavio “Tavio” Sint Jago tambe tabata dediká na brindo(u) i for di su buki Rekuerdonan di Antaño mi a saka e brindo akí, ku su yu muhé Emma a presentá na kasamentu di su Tia
“Konkurensia apresiá,
Maske mi ta chikitu asina, i mi tin bló sinku aña só, tòg fo’i
mi kurason chikitu ta sali pa Tia un kordial pabien.
Tia bo ta nos enkanto,
Tia nos presiosidat,
Tia e lus ku ta poné nos kas briya,
Tia nos flor,
Mashá mashá pabien di Emma, He dicho !”

Pa bo mi lektor, mashá danki pa lesa mi artíkulonan. Mi deseo di felisidat, bon salú i logronan grandi den 2025. He Dicho!