Nos a pasa nos hubentut, ku weganan di ántes, anto di un manera sumamente agradabel. Pero mi no ta mira ku nos por bai na reskatá e weganan akí, sigur no, na e manera ku mundu ta desaroyá, ku tur e weganan nobo ku ta surgiendo. Muchanan no ta hungando ku mesun variedat i intensidat manera nos tabata hunga ántes. Muchanan di siglo 21, ta buska otro pasatempu i ta solamente rekuerdo a keda i ta den artíkulo manera esaki bo ta lesa ki sorto di wega tabatin i kon nos tabata hunga ántes. E artíkulo promé ku esaki a lanta rekuerdonan di nos weganan di ántes.
Si mi kue mi famia, nos tabata ocho ruman na kas, ta kasi un tim di futbòl kompletu. Awor akí un famia a bira chikí i apénas tin dos yu den famia. E dos muchanan ei ta bai kualkier lès di yudo, landamentu, futbòl òf ta sinta ku nan tablèt den man. Nan apénas ta hunga ku otro i e relashon di famia no tei. Temporada di Sanikolas no tin kuenta di tròm, outo di polis, kabuya pa bula mas, pero ta tablèt ku diferente sorto di “videogames”.
Nos tempu no tabatin televishon na drechi i awor, Youtube, Netflix i otro formanan digital ta dominá e era di nos muchanan. Ántes nos tabata hunga ku otro físikamente, awendia esei ta bai den forma digital. Miéntras ku e sistema di awendia ta duna e mucha chèns pa siña un idioma moderno, den e kaso aki mas tantu e idioma ingles, nos weganan di ántes tabata siña nos sea kanta, bisa rima i físikamente nos tabata keda den kondishon. Papiando di idioma, aki a bin un kambio drástiko ora nos papia di weganan di ántes i awor. Nos weganan di ántes a yega nos for di Hulanda, weganan ku frater i sùr a introdusí i awor ingles ta dominá pa motibu di e avalancha di inovashonnan ku ta yega nos atrabes di mundu digital.
Diferente di nos weganan ku tabata tuma lugá den nos barionan i dependé di bario nan tabata duna otro regla na e mesun wega i tabatin otro ekspreshon tambe. Hopi sorto di wega ku no solamente tabata konosí den diferente bario, pero tambe na otro islanan di Antia i asta na otro parti di mundu. Den e buki: “Lemante – Weganan di ántes i awor” di Frank Elstak mi a lesa ku por ehèmpel nos wega “pele” ku nan tabata hunga e wega akí na Europa i na Oustralia. Nos tabatin un wega ku segun Frank Elstak nos tabata yama “Kater”, esaki ta e wega ku nos ta hunga ku hilunan pasá den dede i forma figura, ku nan ta hunga e wega akí na Ijsland i na Merka i e wega akí yama “cats cradle” ei nan. Na Aruba i Boneiru e yama “kanchi”.
Awor bèk pa nos rekuerdonan, bida di bario tabata mas intensivo tambe. Bo tabata partisipá muchu mas tantu ku i den bo bario. Aña di la reina, kompetensia di futbòl den bo bario, sine trùk den bario, patfenderei, jonge wacht, high flying park, kampamentu den mondi, i tur nos diferente weganan ku tabata tuma lugá den kurá di skol, na kas, riba kaya etcetera. En bèrdat manera un hende a opservá, tabatin muchu mas tantu wega ku e wega di belin ku mi a deskribí biaha pasá.
Nos a traha fli i a subi fli, nos a buska palu di kaha di bakiou òf kaha di mashin Singer ku tabatin nan depósito kaminda awendia ofisina di korant Extra ta den Mundu Nobo, pa traha speilu i nos tabata haña rabu pa fli serka nos mama, despues di kòrta i saka esaki for di saya òf shimis bieu. Por sierto ku e mesun kahanan di mashin Singer, tabata sirbi tambe pa nos traha nos garoshi ku nos tabata baha for di Seru di Pipa, sin ningun preokupashon i riba velosidat haltu, sin brek. Kisas e tempu ei tabatin mas angel wardadó?
Bo sa, mei mei di tur e weganan akí, nos tabatin kustumber tambe, ku nos tabata bai piki amandel na e diferente kasnan di polis makamba den nos bario i despues di kome e kuminda di amandel, nos tabata kibra e pipita pa saka e nechi ku nos tabata kome tambe, nos ta bula kurá i bai kue mango, figo, kenepa, sòrsaka i kuantu otro fruta ku e kurá di nos hendenan di bario tabata duna nos. Klaro ku hopi biaha nos no tabatin pèrmit, pero nos tabata hasié tòg. Na momentu ku mi ta skirbiendo e artíkulo akí, tin un palu di mango kargá ku mango hechu na skina di mi hanchi, grandi ku ta asta kologá riba kaya, i bo no ta mira ni un mucha ta pasa kue ni un mango kome.
Un wega ku bo tabata mira tur santu dia den kurá di skol, den kurá di kas i riba kaya tabata wega di tròm. Wega di “peko”. No tabata mi wega faborito i mi mester bisa pasobra mi no tabata mashá bon tampoko den baila tròm. Rene mi ruman tabata tremendo den esaki i a yega di splet diferente tròm. Por sierto ku e tabata eksperto di pone pui skèrpi pa splet e otro muchanan su tròm.
Ami tabata mas bien den weganan di loke nan tabata yama wega di “gezelligheid” ounke ku tabatin algun di e weganan ei ku ta pone bo sufri un tiki tambe. Bleki Bleki, pasa faha, polis èn dif, bula kabuya, ninichi, belin, pia di palu, sam, dukla, bleki buriku ( trapa riba bleki i pega esaki den bo sapatu), kana riba man ( otro arte ku Rene mi ruman tabata dominá), hunga djèks ku mi rumannan muhé, hunga buriku( subi riba un otro mucha su lomba i bia bringa ku un otro pareha i wak kua por tumba e otro),hunga pusta ku tayer.
Tabatin wega ku ta di mucha hòmber so, di mucha muhé so i wega ku tur dos por a hunga. Awèl den mi famia kaminda nos tabata 4 ruman hòmber i 4 muhé, mi tabata partisipá na e weganan di mucha muhé sin ningun problema: djèks, bula kabuya, katsenbal, etcetera.
Ounke bulamentu di kabuya tabata un wega pa mucha muhé e tabata un wega faborito di mi, pa motibu di e tekstonan. Bo ta kòrda: “Anna stond te wachten, te wachten op haar man, ‘s nachts om twaalf ure, daar kwam die smeerlap aan… Òf “ik wil trouwen met een edelman, bedelman, dokter, pastoor, koning, keizer..”. Hungando “katsenbal”: Karel I brak zijn been, Karel twee sprong in zee, Karel 3 brak zijn knie, karel 4 dronk een glasje bier, Karel 5 sloeg zijn wijf, Karel 6, kurk op de fles; Karel 7 stond te beven, Karel 8 soldaat op wacht, Karel 9 voeten vegen en karel 10 ik heb je gezien.
Bo ta kòrda e manera kon nos tabata saka afó, ken a saka bientu? Bo tabata bisa e siguiente rima: Eshi porèshi, de toka maraka. Echi porèshi, de skeins kawó. Echi porèshi, De, Ka, puf. Esun ku sali na “puf” ta sali liber.
Komo mucha bo tabata duna diferente variashon na e weganan i tin biaha ku bastante astusia i asta ménos nèchi. Por ehèmpel: nos tabata palabrá ora di polis èn dif, nos ta bai un otro sitio, laga e mucha ku tin ku buska, buska te blikia. Òf ora di hunga pasa fa, nos ta hinka pida palu den sushi di kachó òf den berpùt i usa esaki komo faha.
Nos tabata bai kas di otro mucha, i tabata bai kome, lechi KLIM ku suku, buskuchi soda ku lechi kondèns; kool-aid ku suku aden, pasa botika kumpra “kandijsuiker” òf engelse drop, pone sèn huntu i bai restorant San Francisco i kumpra saté ku batata i parti esaki den 5 mucha.
Mi hubentut tabata riku i mi a partisipá den “zakdoekje leggen” i rima “ienne miene mutte…”, mi mama a kue mi man i hunga “dede pikiña, ku su bisiña, mayó di todo ..”. ku mi, mi a hunga wega instruktivo di “mama, mag ik reizen, i bo mester tabata konosé algu di geografia pa bo por a bisa e nòmbernan ku mas sílaba. Mi a bula kabuya. “in spin, de bocht erin, uit spuit, de bocht eruit…”. Mi a yama telefòn di bleki i mira mi ruman muhé traha pòpchi di bòter.
Mi tabatin suerte di por a kore vlòt den tam i landa na pipa riba Rif. Hunga den santu na Nederhorst, kana riba pia di palu i huntu ku George Merced, hunga pusta riba vèlt di Mundu Nobo i kore ku batata den kuchara i bula den saku.
E tempu ei, nos tabata yuda nos kurpa ku loke nos tabatin: “Si totolika no pone, kiko yu di rei ta hunga kuné? Ku tera ku pishi”! Sapaté, na bo sapatu!Reginald V. Römer
