Den mi búskeda na orígen i eksistensia di bar, snèk i lanthùis, mi a keda gratamente sorprendí pa e kreatividat i variedat den dunamentu di nòmber na e diferente establesimentunan akí. 
Bibando den Granbeeuwweg, mi a bai buska orígen di e nòmber ei ku a hiba mi mesora na Lanthùis Granbeeuw, ku ta keda un kaya promé ku mi kas i ku segun Pater Brenneker tabata pertenesé na un tal S. Granbeeuw. 

Nòmber

E diferente lanthùisnan, ta tin sea nòmber di e bario ku nan ta den, òf nòmber di e doño di e lanthùis. Algun otro ta karga nòmber di kariño, òf e nifikashon ku nan ta tin pa e doño: Por ehèmpel Ascención, na nòmber di e pueblo indjan La Madre de Dios Ascención, Lanthùis Bever(Daniel Beevers a kumpra e lanthùis despues), ku promé ta yama Lanthùis Buena Vista, pa motibu di e bunita bista, Lantuis Blauw (Ann Blauw ta doño di e plantage), Lanthùis Hel, ku a kambia hopi di nòmber i a keda karga e nòmber Hel, aparentemente pa motibu di un pareha ku konstantemente ta tin problema ku otro.

Ta tin lanthùis ku ta tin diferente nòmber of ta tin un nòmber di kariño of un nòmber di pueblo. Ta bon pa bo buska i wak kua lanthùis nan ta yama: Nooitgedagt. De Hoop, Engelenberg, Klein Ascención, Rustenburgh, Oud St. Maria Damasco, Goed begin, Kleine Zuurzak, Gerustigheid, Wel te Vrede, Berg Carmel i Rust en Vrede

Tin nòmber ku mesora bo ta komprondé e nifikashon, nòmber di e doño (Netto Bar nòmber di Kariño di e doño Ernesto Idelfonso Koster), nòmber di e bario (Lanthùis Brievengat) Jan Doret Snack i por ehèmpel Ons Hoekje Snack (Nos skina).

Habrimentu di snèk tabata basta fásil i no ta tin mester di masha papel, solamente e doño mester tin nashonalidat ulandes. Hopi snèk tabata di muhénan latino, ku ta kasá òf biba ku’n kurasoleño. P’esei bo ta haña nòmber nan manera: El Provocon – El Ventaron – No me olvides – Suzanna Snack – Rancho La Campana – Princesa Snack – Snack Los Muchachos – Yolaska Snack. Ami a tende solamente un snèk ku number di un hòmber “Cencio Snack”, òf ta algu otro nan ta kier men. Habri snèk ta dje fásil ei, ku durante karnaval bo ta haña Karnaval Snack ta habri, pa sera ora marcha di karnaval pasa, i kisas habri bou di otro nòmber otro aña.

Bar si ta muchu mas maskulino i aki nos ta haña : Bar Restorant Richnel, Netto Bar, Chi ku Cha Bar, Bar di Keke, Martin’s Oranje Boom, Rudy’s Bar, Papa Thona, Bar di Vicky Boom, Bar di Patricio, Bar Pancracio, Restorant Nelis

4^th of July snèk a habri di 4 di yüli 1945 i segun mi, anto Papa ku Pèchi snek ta aña ku e tumba hubenil a bira popular; flamboyan snèk ta paso ta tin un palu di flamboyan den kura i meskos ta e kaso ku Shimaruku Snack. Ora tur dos e palunan akí a muri, e snèk a kambia di nòmber. Pero awor splika mi Hantrèm snack, His’é But’é, T’aki mi ta  Snack, Frena Pretu Snack, Stiwi Snack, De Zoete Inval, Café de Gouden Geit.

Finalmente na Kòrsou a hasi uso tambe di nòmber di abitantenan di kas Real: Prins Bernhard Bar, Restorant Juliana, i no papia mes di nòmber di santunan: Bar San Rafael, Martin de Porres Snack; Santa Clara Bar, Restorant San Francisco, Restorant San Marco. Mi sa ku di kas Real, Rei Willem Alexander a yega di bishitá Netto Bar, pero ounke a yora na tur santu, ningun a bishitá ningun snèk òf bar. Klaro, bo no por sende un bela pa Dios i un pa Diabel.