Aap, noot, Mies, Wim, zus ta zona ketu bai den mi kabes i kere mi ku mi no ta kòrda kiko tabata  relashon di Ot ku Sien. Mi ta kòrda e buki “Rozemarijntje en het zwarte bosmannetje” ku frater Mol a skirbi i ku nos a lesa e tempu ei na skol. Mi ta kòrda ku promé ku skol kuminsá bo tabata haña bo vitamina C, ku nos tabata gusta asina tantu, pa su smak zut/zür. Mi ta kòrda ku a ekskluí mi for di kor, pasobra mi no tabata por a kanta, en kambio mi tabata estelar e tempu ei den tim di futbòl di skol.
Atrobe mi bario Mundu Nobo, pasobra mi ta identifiká mi mes ku mi bario kaminda mi a lanta komo mucha i bai skol. Anto den Mundu Nobo tabatin tres skol básiko, Mgr. Niewindt College (1951), St. Elisabeth School i Coromoto College. Un kombinashon di bruder-zuster- i fraternan a traha skolnan. Sùrnan ta mas konosí ku a traha skolnan den kunuku, miéntras ku fraternan tabata mas den siudat. Awor akí, bibando den Banda Ariba i mi pasa Skèrpènè, mi ta keda atmirá e edifisio mahestuoso kaminda un tempu fraternan a konstruí e edifisio akí pa huérfano i ei tabata siña fishi pa bira karpinté, mètslá, òf sneiru. Ami a bai Mgr. Nieuwindt College i nos mester a paga “schoolgeld”. Esaki tabata skol di plaka. Pero ta fresku den mi memoria, kon frater a manda mi kas, ora ku mi no por a paga 5 florin ku nan tabata kobra. I huntu ku mi, tabatin mas mucha ku a keda deprivá di enseñansa te dia ku nos por a paga e sèn. Awor, esaki tambe tabata un tremendo chèns pa nos, pa ora frater kobra bo, bo skonde e sèn den bo atlas i bisa ku bo no tin sèn i frater ta manda bo kas i bo por a bai kore vlòt den tam i presentá siguiente dia na skol ku e sèn manera nada no a pasa i asina bo a stet skol un dia.

Tabatin dos tipo di skol básiko, skol di pòrnada i skol di plaka. Promé ku skolnan katóliko a kuminsá haña supsidio di gobièrnu, iglesia katóliko tabata usa un parti di entrada di skolnan di plaka pa mantené skolnan pòrnada. Sobra sèn tabata bin di donashon hulandes. Ora bo kaba skol básiko bo por a sigui pa MULO, ku tabata e skol sekundario mas konosí. MULO tambe tabata skol di plaka i tabata muchanan ku sali skol básiko di plaka so por a sigui MULO. Si tabatin mucha di skol di pòrnada ku ta siña bon, fraternan tabata hasi eksepshon pa nan bai MULO, pero tur otro mucha pober mester a buska trabou ora nan kaba skol pòrnada òf nan tabata bai siña un fishi den  wenkel di Pader. Mucha muhénan tabata bai siña kose.(loke nos a konosé despues komo “huishoudschool”) Ami a kuminsá mi MULO na St.Thomas College i despues Direktiva di Skolnan Katóliko a konstruí dos barak den kurá di Mgr. Niewindt College i asina mi a bolbe mi bario pa enseñansa avansá na Andreas College.

E skol di pòrnada mas konosí tabata St. Vincentiusschool (pa straño ku ta parse kasi tur skol di pòrnada tabata “school” miéntras ku skolnan di plaka tabata “kolegio”). Mi sa ku nos mes den forma un tiki denigrante tabata bisa ku nos a bai “college”, lubidando ku hopi biaha mi mama no por a paga mi sèn di skol. Komo alumno di Mgr. Niewindt College nos tabata bai hunga bala kontra St. Vincentiusschool i mester atmití ku nan tabata mihó ku nos den deporte. Pero kada biaha e enkuentro deportivo akí tabata kaba den pelea. Ami konosé vários hòmber ku a okupá puestonan klave den nos komunidat ku a bai skol di pòrnada. Mi tabatin e impreshon ku fraternan no tabata gusta nos mete muchu ku skolnan di pòrnada, algu ku awor na grandi mi ta eksperensiá komo “diskriminashon”. Pa parti Punda nos tabatin Emmaschool komo skol di pòrnada i e dos skolnan hopi konosí den nos komunidat ku tabata Wilhelminaschool (pa mucha muhé) i Hendrikschool (pa mucha hòmber).

E tempu ei, fraternan tabata dediká tempu na deporte, arte, kanto i despues di skol, nos por a sigui hasi uso di e infrastruktura di skol. Nos tabata hunga i hasi deporte despues di skol. Tabatin hopi aktividat deportivo i edukativo despues di skol. Pero tambe komo strafwèrk nos tabata keda skol pa yuda limpia skol etcetera, ora ku bo no tene bo na reglanan di skol. Un di e reglanan ei tabata, ku no ta permití bo papia papiamentu pafó di klas. “Nederlands spreken, spreken Nederlands”, esaki bo mester a skirbi te ora bo kansa komo strafwèrk ora ku frater haña bo ta papia papiamentu. Ku eksepshon di lès di katisashi na papiamentu, fraternan a disidí ku no ta papia papiamentu na skol. Esaki tabata tambe e inisio di e eterno problema den nos enseñansa, esta kua idioma nos mester usa. Otro kastigu tabata ora frater haña bo ta kou bals, ta pega e bals na bo frenta i ta pone bo pega bo frente na “blauwe muur”. Ta fraternan so por a inventá un kastigu asina. Na Mgr. Nieuwindt College mi ta kòrda Frater Alvarez, Mener Rengering, Mener Horvers, Mener Vos, Mener Sjak Shie.

Despues di Mgr. Nieuwindt College, mi a pasa pa St. Thomas College, promé na porta di hòspital, despues Hoogstraat i finalmente mi a bin kaba MULO na Andreas College, un skol di algun klas ku Direktiva di Skolnan Katóliko a traha den kurá di Mgr. Nieuwindt College i den kua nan a hinka alumnonan di Mundu Nobo, Charo, Veeris, Marchena i Wishi. Ei nos formashon tabata den man di entre otro: Menernan Pieters (Pieters Kòrá i Pieters Pretu pa distiguí nan di otro), Mener Piton, PaLau, Frater Gustaaf, ku nos tabata yama Gustavo, Mener Frank Francisca i Mener Girigorie, Mener De Goei, Mener Boy de Windt,  Mener van Rens i Mener Otmar Noorden.

Te 1940 MULO tabata nos enseñansa avansá mas haltu i na 1941, gobièrnu a lanta Peter Stuyvesant College (Kolegio Alejandro Paula). Peter Stuyvesant College a bira un skol públiko, pero tabata permití pa duna lès di religion na yunan di katóliko, protestant i hudiu. Esaki no a kai den bon tera serka iglesia katóliko i na 1950 nan a habri Radulphus College. I despues nan a lanta Maria Immaculata Lyceum pa mucha muhé. Radulphus College tabata konsistí di un HHS (Hogere Handelsschool) i un HBS-B. HHS tabata intenshoná solamente pa prepará muchanan pa nan por traha despues na gobièrnu, banko òf komersio. Despues nan a kambi’é den HBS-A. Di e manera akí tantu mucha di HBS-A komo HBS-B por a sigui un estudio despues. Anto e skolnan akí tabata leu for di barata, bukinan karu i eventonan ku bo mester a paga ku no tabata dos plaka.

Riba e potrèt ku ta kompaña e artíkulo akí, por mira algun di mi kompañeronan di ántes, tin algun ku no tei mas: Humphrey Mongen, Stanley Everon, Ernest “Kèkè” Willems, Ronchi Isenia, Humphrey Martina, Fèti Cijntje, Fidelio Frans, Romeo Heye, Lasten, Welvaart,  Filibertus “Fido” Silvano, Siefried Martis, Hyacinth Melfor, Arthur Tholel, Wenny Jacoba, Hebron Adoptie, Doran, Jacques Luysterburg, Humphrey Adamus, Lourens, Texeira, Dennis Noorden, Donald Meulens. Frater Gustavo i mener Ruben Pietersz.
Esta dushi ta: Sinti bo much’i skol atrobe (1962 – 1967)!