Piropo!

“M’a laga un pipita di salu kai den santu, dia nan hañ’é lo mi stòp di stima bo”!(komposishon Golbert Renato “Bibi” Gonet – Un Fabor)

Bo ta kòrda kon ántes nos tabata skirbi karta pa nos frei i kon nos ta kuminsá nos karta? Un karta ku stropi tabata basha afó. I nos ta buska un chèns pa despues di lòf, entregá e karta na bo frei i buska un chèns pa bo por haña su lensu.
“Sperando ku na yegada di es karta akí, lo bo ta enkontrá den bon salú, manera ta mi mas ferviente anhelo. E pen kòrá ku mi ta skirbi es karta akí, ta tipifiká e sanger ku ta kore den mi kurason ku ta brota di amor pa bo”. Esaki tabata piropo ku nos tabata usa ántes, basta aña atras.  Pero e tempu akí di “deklamá amor” a pasa pa olvido.

Piropo: ‘expresión de admiración o elogio que se dedica a una persona’. Esaki ta loke dikshonario ta bisa di e palabra piropo, ku por sierto nos a standarisá i ta aparesé den buki di oro. Kasi semper e direkshon di komuniká ta di hende hòmber pa hende muhé i ami no ta konosí ku e echo ku hende muhé tabata òf ta tira piropo pa hende hòmber. Algun biaha mi a tende i lesa un remarke di hende muhé, ora nan a mira un gai ku bon tipo, bon bòdi i nan a komentá: “vitamina pa wowo”. Mayoria biaha ta un hende muhé ta kana riba kaya i ta pasa un hende hòmber, òf un grupo di hende hòmber i e hende hòmber ta hasi un remarke den direkshon di e dama. E piropo tin karakter amoroso/seksual i hopi biaha e personanan no konosé otro.

Den “Papiamentu Pika”, di Akademia Papiamentu Boneiru (2021) ta deskribí piropo: Frase ku un yònkuman ta bisa un mucha muhé ku e ta mira pasa,den kua e ta ekspresá su atmirashon pa e bunitesa total di e damsita i nan ta duna e siguiente ehèmpel: ‘Mi ta pusta ku bo nòmber ta Google, pasobra bo tin tur loke mi ta buska. Konta e streanan na firmamentu, konta nan dos dos; si nan ta parse bo hopi, ami ke bo muchu mas.

Pader Paul Brenneker tin komo no. 15 den su buki 3000 Denksels: Ik zei tot de wijze Wei: “ik wordt oud” Wei dacht na en zei: “Kan niet, goud wordt niet oud”; ik dacht na en zei: “gracias por la flor”.

Manera Rignald Recordino a yega di bisa: ‘nos a lubidá ta kiko ta frei, nos a lubidá kiko ta amor’. Ningun kaminda, den nada mes nos no ta hasi uso di piropo mas i asta nos a kue piropo i kambia esaki den vulgaridat. Un tèrsio wetando un shon un tiki gordo ta pasa: ‘Eh eh, mira karni ku bichi tin di kome i ami tin hamber’; ‘eh eh mama, tur ei ta di bo?’ Den “Dòria Pegá” di Elis Juliana: “Un hòmber di basta edat a para ta hari bisando kasi den su mes: “O, mira ki sebu ta hasi anto houru ta para frusa”!

Elis Juliana den su obra ‘Donde Cuba’ ta deskribí ku yu di Kòrsou no tin modal i no ta nada romántiko: ‘Ajá un hardin de muchachita dulce manera canja mes. Por la Sabado asina si bo sali pa dibertí, ay ta djodjo bo ta djodjo. Pero akí, ay Djo me libra. Si bo mira una mosa, bo saludé con cortesia, e cara so ke drei mirábo, Cielo Santo, bo ta spantá. Y por donde ke bo en sa ta sali un cabayero ma bruto ke Goliath’.

Den pasado, den nan obra, nos eskritornan a hasi bon uso di piropo i a usa esaki na tur sorto di manera.

Elis Juliana den su obra ‘Yalurs’ (Flor di Anglo) despues di a kaba di zundra e muhé ta kaba e obra: ‘Mi kuminda ta friando? Lag’e para té despues. T’abo mes ta mi kuminda; mi ke komebo aki mes’.Na spañó nan lo yama esaki piropo gastronómiko.
Su obra Flor di papel (Flor di Anglo) ta piropo djariba te abou.
Elis Juliana for di su obra “Amoraseka” Taya. Promé kònòpi flor ku a habri den hardin di mi hubentut”.

Pierre Lauffer den Wiri Wiri tin un obra “E Karta”, “Lus di mi wowo, lagrima ta jena mi alma, ki ora ku dulsura di bo kara tenta deseonan profundo i sentimental di mi pober kurason”.

Awor aki de bes en kuando Fifi Rademaker ta publiká algun piropo riba su página di FaceBook. Un persona ku semper bai ta kontentá mi ku su eksperensia ta Lucille Berry Haseth i mi a pidi Lucille bai bèk den su hubentut i esaki ta loke mi a haña di Lucille Berry Haseth.

“Piropo ta ekspreshon verbal o gesto ku ta usa pa elogiá un hende spesialmente pa loke ta su aspekto físiko o su atraktivo personal. Por ta entre otro un frase kreativo ku palabra dushi, un kòmplimènt, un deklarashon romántiko. Ta importante señalá ku por mira piropo di manera diferente segun e konteksto kultural, tono i intenshon ku kua ta ekspres’é i ku den algun kaso e por resultá ofensivo òf inkómodo pa e persona ku ta risibié.

Nasementu di Piropo

“Piropo tin rais masha bieu, ya ku for di tempu ku ser humano a kuminsá ekspresá su sintimentu, el a haña manera di elogiá i konkistá ku palabra. E nòmber “PIROPO” ta bini di griego (pyropus), ku ta nifiká kandela kòrá, pasobra e ta evoká ku esun ku nan tira e piropo p’e, no ta importá su koló di kara, su kara ta bira koló di tomati hechu. Den antigwedat, poetanan griego i romano tabata dediká verso na beyesa i grasia di nan amada”.

“Durante Edat Media, trobadornan ta perfekshoná e arte di elogio na forma di kansion i poema dirigí na damanan di noblesa, kendenan tin bia tabata laga e kabayeronan kortehá nan ku elegansia. Ku tempu piropo a bira un kustumber popular, prinsipalmente den kultura spañó i latinoamerikano, kaminda a us’é tantu den galanteria sinsero komo na wega, pa sedusí e hende ku e tiradó di piropo ta gusta.

Ehèmpel di piropo

Di hòmber pa muhé:

• Bo wowonan no ta dos lus, nan ta dos strea ku ta iluminá mi shelu.
• Si beyesa tabata tempu, abo lo tabata mi eternidat.
• Ta iman bo ta? Pakiko kada be ku mi mira bo, mi ta sinti mi atraé na bo?
• Konta tur strea na shelu. Konta nan dos dos. Si nan ta parse hopi, mi ke bo muchu mas.
• Kiko a sosodé awor den shelu? Ta angelnan a baha bini Tera?
• Si bo tabata mi frei lo mi a bira ateo. Pakiko? Pasobra lo mi no tabatin nada mas pa pidi Dios.

Di muhé pa hòmber:

• Bo no ta Google, pero bo tin tur loke mi ta buska.
• Tin bisá ku kos bon semper ta tarda pa yega, p’esei bo a tarda tantu pa aparesé den mi bida.
• Si bo tabata kansion, lo bo tabata mi melodia faborito.
• Ta mi plaser elogiá bo manda bo shelu manera rakèt.
• Abo ta e motibu pakiko mi ta kere den amor.
• Bo ta mi kos di kome Pasku mainta.

Segun tempu a pasa, piroponan a evolushoná, keda komo un forma di atmirashon, semper ku nan ta di bon smak i ekspresá ku rèspèt.

Lamentablemente tin miembro maskulino di nos komunidat papiadó di papiamentu, ku ta komportá fo’i òrdu i tira piropo ekstremadamente vulgar.

Hopi kos di antaño konsiderá e tempu ayá grasia i apresio, awendia ta konsiderá delito. Tin hende muhé – ku no ta di e paisnan kalor – ta sinti nan ofendí si un hòmber tira nan un piropo, hasta si ta un piropo delikado, galante i ku rèspèt. Pero nos muhénan di akibanda sigur por apresiá un piropo ku NO ta vulgar i ku ta laga bo sinti bo paden i pafó dushi.
Mi ta kòrda algun piropo di “tempu di mi tempu”:

Alka-Seltzer!
Si bo ta kushiná meskos ku bo ta kana, lo mi kome hasta raspá di wea!
No laga nos kai den tentashon, ma libra nos di malu!!
Mi ta kere ku na bo kas lo tin hopi vruminga!
Kreador ei por a traha kos bunita!