¹Hasi manera otro ke pa bo hasi.Den kuadro di selebrashon siman di kultura di 30 di sèptèmber pa 6 di òktober 2024 mi kier presentá e artíkulo akí, pasobra mi ta haña ku nos pueblo mester konosé su rais kultural. Kultura ta base di nos desaroyo i ta yuda forma identidat di un pueblo.

Mi a lesa pasashi den dos diferente buki di pasado tokante nos tambú i awor mas ku nunka mi por komprondé e lucha ku diferente hende a hiba na fabor di tambú. Den e buki di N. Van Meeteren – Volkskunde van Curaçao na página 45, Van Meeteren ta skibi di un forma basta denigrante di tambú, ku no ta kantamentu esei ta, pero un sorto di gritamentu mahos ….. “ die meer een krijschen dan een zingen kan worden genoemd”. Mas aleu van Meeteren ta aprobá ku gobièrnu i iglesia katóliko a prohibí tambú, pasobra e ta inmoral.

John de Pool, den su buki “Zo was Curaçao” ta dediká 4 página na nos baile i muzik di ántes i na final di e kapítulo e ta skibi: ….. “bij de volksfeesten vond men vrijwel dezelfde dansen, maar over het algemeen eindigden, die in een luidruchtige ‘tambú’ waarbij vol vuur met stokken en flessen geslagen en gegooid werd, hetgeen op zijn beurt veelal eindigde in het ‘fiscalaat’, de gevangenis’. P’esei mi ta agradesido na hendenan manera entre otro Rene Rosalia, Richinel Ansano, Rose Mary Allen, Ietteke Witteveen, ku a keda mustra nos riba e importansia di nos kultura, e importansia di tambú den nos folklor i keda kòrda nos ku tambú ta un ekspreshon kultural original ku nos tin.

Victor Dorothea a konta, ku nan tabata sinta den kabes di seru Samangó. Nan tabata bai einan regularmente pa toka nan barí. Dos agente polisial a yega i bisa Vi: “Vi nos sa ku ta abo ta toka barí i pastor di parokia di Sta. Rosa a instruí nos pa kita bo barí, pasobra e ta zona muchu duru”.

Muzik ta mas ku divershon. Ku muzik bo por ekspresá bo emoshon i mantené bo pasado bibu. Gruponan por eksperensiá nan kultura i nan identidat kolektivo ku muzik, por ehèmpel den ritual. I finalmente por usa muzik pa duna informashon i kritiká sosiedat i polítika. Tur e funshonnan aki ta ingrediente di e ritmo tambú.
Tambú ta originá di Afrika. E palabra tambú ta e instrumènt pero tambe e baliá.

Den tempu di sklabitut, gobièrnu di Kòrsou a hasi tur loke tabata posibel pa bringa tambú. Asta despues di abolishon di sklabitut, a purba di skrap tambú. For di 1936 te 1952 tabatin un prohibishon di tambú na Antia. Tabata mira tambú komo algu diabóliko i e baile komo inmoral. Tambú ta muchu krítiko tambe: fin di aña den komposishonnan di tambú ta rekordá i kanta eventonan sosial i ta kritiká desaroyonan polítiko i sosial. Na 1952 a permití fiesta di tambú atrobe, pero bou di tur sorto di kondishon. Na 2012 a eliminá e kondishonnan. Danki tambe na Horacio Hoyer ku mei mei di siglo 20 a kuminsá graba tambú riba disko.

Tambú a pasa den asina tantu tempestat i hopi di nan okashoná pa nos mes tambe. Mi ta kere ku te dia di awe ainda nos tambú no ta gosa di e rekonosementu ku e meresé.

Finalmente: mi no por imaginá mi un fin di aña sin tambú. Ta un kustumber, ku Kòrsou ta kore ku spiritu, kore ku fuku, i pidi pa energia nobo, sensiando kas fin di aña i marka komienso di aña nobo. Tambú ta zona den kas i rònt Kòrsou i baila tambú tambe ta un parti importante di e kustumber aki. Den e sentido aki, tambú tin un funshon purifikante.

Despues di 200 aña di kondena, toleransia i prohibishon, tambú a bira legal na 1952. Na 2015, a inkluí tambú den Inventario Nashonal di Patrimonio Kultural Inmaterial di Hulanda riba inisiativa di Fundashon SPLIKA. https://www.immaterieelerfgoed.nl/nl/tambu