Nèt promé ku e krusada orketa di Weg naar Westpunt i Weg naar Sint Willebrordus tin e Kapia di Oochi diseñá dor di e arkitekto Ben Smit. Christiaan Engels i Lucila Engels ­Boskaljon, artistanan kasá ku otro a laga konstruí e kapia i tabata us’e komo studio. E pareha tabata sin yu diesdos aña largu, pero despues ku Lucila a bebe for di un fuente serka ei banda, a resultá ku e tabata na estado di oochi.
Wilma Limburg-Josepha tabata biba dilanti di e kapia, i a eredá e maneho di dje di su mama di kriansa ku tabatin e yabi den su poseshon pa mas ku kuarenta aña. Segun Wilma, e pareha artista kier a konstruí un misa chikitu ku su propio santana i nan a kuminsá turesten ku e kapia. Sinembargo kosnan nunka no a yega asina leu i e petishon di e pareha Engels-Boskaljon pa ei bira nan último lugá di sosiegu tampoko no a keda onra.
Pa hopi aña e kapia a para komo siboyo di fertilidat i na su re-apertura, algun aña pasa, tabatin vários oochi presente di ken nan mayornan a hasi orashon den e kapia.
Tempu ku ainda no tabatin un misa na Tera Kòrá, tabata pone Santu Sakrifisio di Misa aki ku bon asistensia di abitantenan di bario. Pa falta di espasio hopi biaha hendenan a keda para pafó.(Fuente: Kòrsou Konosé bo isla, página 45)

Algun siman pasá Biblioteka Mongui Maduro a hala mi atenshon riba algun publikashon ku a tuma lugá entre 1971 – 1975, kaminda un kombinashon di persona: Griselda Hart-Pieternella, Tarcisio (Chicho) Pieters Kwiers, Christiaan Sint Jago S.M. i G. Winklaar tabata publiká e revista Kitoki, Den e revista ei mi a mira un entrevista ku nan a hasi ku Lucila Engels (The chapel of the twin) i ku mi a modifiká pa mi blog. A hala mi atenshon ku komo kabes tabatin pone “un historia veridico”.

Na 1942 Lucila Engels a kuminsá eksperimentá ku pintamentu i tabata un dia ku su primu tabata fungi komo modèl ku el a kuminsá eksperimentá ku pinsel. E tempu ei Sr. Bergeyk, maestro di pintura a bisa ku den su grupo Lucila tabata e úniko ku talento pa pinta.

Lucila a haña ánimo, i a pidi Sr. Bergeyk pa dun’e lès, pero el a ninga. Despues Lucila a pidi diferente otro persona mas pa yud’e ku práktika, pero tur a konsehá Lucila pa eksperimentá e so i lo e haña mihó resultado. Asina el a sigui pinta.
Na aña 1947 huntu ku su kasá nan a bishita Hulanda pa promé biaha, i na aña 1948 nan a biaha pa Caracas i a bishitá museo Bellas Artes pa buska pintura pa museo di Kòrsou.

W. Sandberg ‘eksperto riba tereno di arte, i direktor di “stedelijk Museum” na Amsterdam a mira kuadronan di Lucila i a ofresé pa eksponé su pinturanan den Vondelpark. Den Stedelijk  Museum na Amsterdam tin dos pintura kologá di Lucila Engels i dos di su kasá. Lucila Engels nunka a disgustá ku no ta tur su pintura a haña mes tantu éksito Su material preferí ta fèrf di zeta, kontrali na su kasá ku tabata traha mas ku fèrf di awa.

Den Biblioteka Mongui Maduro tin diferente buki ku ta mustra diferente obra di Lucila Engels, Lucila Engels: Schilderijen, Houtschilderingen van Lucila Engels van 17 september tot 10 oktober 1961 in het Curaçaos Museum, Lucila Engels-Boskaljon 70, Chris en Lucila Engels: catalogus kersttentoonstelling 1950 Curaçaosch Museum, The Caribbean: Essence of the islands, Het Curaçaosch Museum: Het onstaan, de historie zowel als een catalogus van de inventaris van het Curaçaosch Museum; Curaçao, schilderend en geschilderd, Curacao Classics: beeldende kunst 1900-2010 – arte visual 1900 – 2010: antepasado.

Un obra di Lucila Engels deskubri na Hulanda i tresé pa Museo di Kòrsou

Historia di Kapia

Un dia ku Lucila Engels tabata pintando i segun e ta pinta e ta hasi moveshon ku su mannan. El a bisa su kasá :“Bo sa e paña di bela ta chikí pa mi atrobe”. Pa su kasá esaki a kuminsá bira un problema i den su mente a surgi un idea luminoso. El a kontesta: “wèl bo sa lo mi no por duna bo un paña di bela mas grandi, pero si, lo mi por duna bo un muraya pa bo ekspresá bo mes ariba”, i el a laga traha un kapia, riba su tereno na Daniël. A dura dos aña promé ku e kapia a keda kla.
Pakiko un kapia? E pareha tabata katóliko i un kapia riba un kaminda largu por nifiká un lugá pa sosegá pa piskadónan i pa resa na esun ku nan ta kere den dje. Un kapia ta pa hopi ku ta bai landa na Banda Abou un lugá pa pidi Dios warda nan di peliger di laman. Fuera di esei e kapia ta un  atrakshon pa turista. Asina Lucila a kuminsá fèrf e murayanan.

E entrevista ta sigui i ta relatá ku durante 12 aña e pareha tabata kasá, nan no tabatin yu ounke kuantu nan tabata deseá esaki. Pa kasualidat  nèt tempu ku Lucila tabata pone su último toke na e muraya a bin resultá ku e tabata na estado, i ku e tabata sperando un oochi. Esei tabata un  felisidat enorme pa e pareha. Despues di anunsio di nasementu, rònt mundu felisitashon a drenta i despues e pareha a haña dos yu mas.

Periodistanan merikano ku a bishitá Kòrsou despues a yama e kapia “The chapel of the twins”, alegando ku ta pa motibu ku pareha Engels a laga traha e kapia, Dios a bendishoná nan ku e oochi. E kaso aki a hasi hopi furor i te dia djawe tin hende muhé ta bai resa den e kapia pa pidi Dios pa nan por sali na estado.
(saká i adaptá for di revista Kitoki no. 1 mei 1971)