Movementu di scouting na Kòrsou tin un historia riku, di formashon, aventura i un profundo sentido di hermandat. No ta solamente un hòbi; e ta un skol di bida ku a forma generashon di hóben, inkluyendo mi mes. Laga mi hiba boso riba un biahe na orígen i balornan di e movementunan akí, ku a marka nos infansia i hubentut.
Mi Promé Kontakto: Un klup patras di JPF.
E palabra “skouting” ta zona nobo pa nos, pasobra nos a lanta semper ku jonge wacht i patfenderei i Antilliaanse Meisjes Gilde (AMG). Komo hóben di Mundu Nobo, nos a eksperensiá nasementu di Grupo 8 di patfenderei, Simon Bolivar, bou di guia di nos dinámiko hòpman Charles Fernan.
Ku alma i kurpa nos a traha nos mes klup tras di e edifisio di JPF. E lugá ei a bira nos santuario, e lugá unda nos a drenta mundu yamá patfenderei. Tabata un honor i un responsabilidat grandi pa mi, komo vaandrig di grupo 8, yuda guia muchanan nobo. Tabatin un espíritu di kolaborashon enorme e tempu ei
Nos promé lès di entrepenùr: “Een heitje voor een karweitje”
Komo skout, e aventura tabata semper presente, i tambe lèsnan di responsabilidat. Pa rekoudá fondo pa nos kampamentunan, nos tabata partisipá den e akshon legendario: “Heitje voor een karweitje.” Esei tabata nifiká ku nos tabata hasi trabou chikí pa komunidat a kambio di un kontribushon modesto. E akshon aki a siña nos e balor di esfuerso propio i trabou promé ku nos por a gosa di nos aventura. E tabata nos promé lès di entrepenùr!
Sorpresa kulinario!
E plaka ku nos a rekoudá tabata bai pa kumpra kos pa nos ekspedishonnan. Esei tabata inkluí un tradishon úniko: bleki sin etikèt, ku nos ta kumpra na supermarket na un preis masha barata. Durante kushinamentu den mondi, e blekinan aki tabata resultá den kuminda di sorpresa. E emoshon di no sa nunka kiko lo bo haña den e bleki, sea karni stobá, bonchi, bèrdura ò balchi, tabata hasi e kushinamentu ainda mas speshal i hopi biaha bo no por a anunsiá adelantá kiko ta bai kome e dia ei!
Jonge Wacht: Un alternativa ku disiplina
Maske patfenderei tabata un movementu ku hopi balor, den inisio e no tabata aksesibel pa tur hende. Hóben di orígen mas humilde, partikularmente esun ku tabata bai skol di pòrnada, hopi biaha no por a partisipá.
Pa atendé ku e problema aki, na añanan ‘30, Mgr. Verriet i Pater de Bruyn a funda jonge wacht. Esaki tabata un organisashon di hubentut katóliko ku a ofresé un alternativa balioso, pa esnan ku no por a bira patfender.
Jonge Wacht a krese bira un movementu vibrante, karakterisá pa su disiplina estrikto i nan presentashonnan públiko. Nan tabatin nan propio drùmbènt, ku nan unifòrm (karson di kaki i kamisa bèrdè i un sombré kanades). E drùmbènt tabata un atrakshon úniko i e maitrenan tabata algu sin igual. Nòmbernan legendario manera Caspar Anthonia (e promé maître de tambour), Jozef Martina, Enrique Daniel, i Stanley Bonifacio a marka nan nòmber kon ta dirigí drùmbènt. Un momento inolvidabel tabata na 1965, ora e drùmbènt di Jonge Wacht a derotá e gruponan di VKC, patfenderei i marineronan den un kompetensia memorabel na kazèrne di marina.
Antilliaanse Meisjes Gilde i AGPNA
E movementu di skouting no tabata solamente pa mucha hòmber. Mucha muhé tabatin nan propio organisashon.
A funda Antilliaanse Meisjes Gilde (AMG), konosí despues komo Padvindstersvereniging van de Nederlandse Antillen i awe komo Asosiashon di Guia PNA (AGPNA), na 1930 na Asiento. Loke a kuminsá komo un “gilde” chikí pa yu muhé di empleadonan di Shell, a krese bira un organisashon nashonal ku grupo den bario manera Parera, Emmastad, Sta. Maria, Bonam i Mundu Nobo (ku nan klup de Kurá di kabouter).
AGPNA tabata enfoká riba formashon integral di mucha muhé, for di Elvita’s (4 aña) te senior patfender (adulto yòn). Nan ta siña balornan esensial manera liderazgo, trabou den ekipo i trabou komunitario. Awor akí nan a bira mas moderno, ku proyektonan manera ‘cookie sales’, ‘science fairs’ i kolaborashon ku organisashonnan manera GreenKidz i Unesco.
Zeeverkennerij: skouting riba awa
Pa esnan ku tabatin amor pa laman, a funda Zeeverkennerij Mgr. Verrietgroep riba 19 di novèmber 1949. E zeeverkenner ta un skout normal, pero su enfoke ta riba aktividatnan di awa manera rema, kano i zeil.
E grupo a krese rápidamente, establesiendo nan klup na Spaanse Water (Brakkeput Ariba). Loke a kuminsá ku apénas tres boto bieu bou di guia di Broeder Maalsté, a floresé den un organisashon stabil ku mas di 90 miembro.
Aktividatnan di zeeverkennerij ta enfatisá importansia di kolaborashon, disiplina i liderazgo. No ta straño ku hopi eks-miembro a opta pa un karera marítimo, for di tékniko te kapitan riba barku komersial! Danki na entre otro pareha Ackermans i tambe Henry Hernandez
Poder di kampvür
Sea ku tabata bivaker den klup òf kamper bou di strea den mondi, punto kulminante di kada aventura semper tabata e kampvür na final di dia. Tabata invitá mayornan pa un “openhouse”, unda nos tabata hasi skèchnan, kanta kantikanan bieu di skouting i kompartí rekuerdonan. E momento aki, banda di kampvür, tabata sera amistat pa bida largu.
Legado ku nos mester karga
Skouting na Kòrsou, den tur su formanan, sea patfenderei, Jonge Wacht, zeeverkennerij, òf muchanan muhé di AGPNA, tabata muchu mas ku hòbi. Tabata un skol pa bida ku a siña nos disiplina, aventura, amistat i un profundo sentido di orguyo.
Awendia kaminda pantayanan ta tuma over i konekshonnan virtual ta bira norma, ta bon pa nos hóbennan bolbe deskubrí balornan di skouting. Bolbe siña traha huntu rònt di kampvür, siña mara kabuya, siña zèil i prinsipalmente: siña ta hende. Esakinan tabata lèsnan pa bida.
Hopi great. Mi mama tabata for di 8 aña ku AMG. Awor aki ku su 85 aña e ta miembro di Copernicia ku ta un oud padvindersters vereniging.
Ami tabata na AMG i mi yu muhe na oatfinderij di Igkesia. Te ku jambouree!!!!
Kosnan ku mester rebiba bek!
Mi no tabata sa ku Jonge Wacht a ser krea pa muchanan di skol di pòrnada. Mi a bai skol di pòrnada, pasosobra mi a keda sinta 2 bes na skol di paga i mi mama a haña baimentu di skol pagá ta bentamentu di sèn afó. Mi tabata den Jonge Wacht riba un “blauwe maaandag”. Mi ta kòrda kon frater tabata hiba nos den trùk bai landa na Brakapoti riba djarason mèrdia.
Mi mes tabata patfender den Groep 5 dirigí door di Hopman Seymor i Vaandrig Amos Agard na Suffisant. Amos tabata e témpu ei tambourmaitre di e prestigioso drùmbént di patfenderij. Dushi tempu!
Nos tabata den Jonge wacht Coromoto, parti di Region di otrobanda. Nos barionan Charo, Mundu nobo, St. Helena, Wishi, Marchena, Dòmi, Baraltwijk, Colon, Ser’i Otrobanda i Rif, tbtin Leidernan salí for di famianan Bloem, Sofia i Fabian den mundu nobo, Balooche, de Lanooi i Schoop den Charo. E gruponan di Jonge wacht di Coromoto, Santa Famia i Wishi tabata uni ora tin Parade. Nos drumband tbt un kompetensia srrio pa esun di Santa Rosa. Chè de Lanooi tambe tbt un di e “Maîtrenan” famoso. Deftu Coleo tbt un di nos trompetistanan. Dftu Wimbert Scharbaai di Charo i Roland “Yuyu” i dftu Boy Sporkslede de la Croes di Dòmi,
nos lead drummernan.
Tbtin tambe e “Mayorettes” di Maria College ku tbt kompañá nos drumband uní duante Parade. Nos region a pone tambe fiestanan na St. Vincentiusschool organisá pa e.o. Harold Juliana i otro leidernan.
Dushi tempu …!
Mi tata tabata den Jonge Wacht. E no por a warda kampamentu pa nan slaktu kabritu p’e kome sanger fresku fresku. Ku Niagara Jonge Wacht a yega di bai Bonèiru.
Mi a bai skol di pornada Sint Laurentiusschool na Buena Vista i tabata pa un periodo kortiku den Jonge Wacht. Mi no por a kontinua pasombra aktividat tabata riba djasabra i ta mesun dia riba kual mi tabata hunga fùtbol den Vesta serka Jo Mathilda i Frank Gregg i tambe beisbol serka Frank Curiel. Un kos sigur mi por bisa, esta e balornan di gruponan uniforma ta inmenso i mester keda salbaguardia.
Persy dushi pa rekordá e tempu bunita ei. Mi mes tambe tabata “welp” na e ferkenerij na zuikertuintje ku Hopman Ven der Ree. Hopi dushi rekwèrdu. Mi ta korda ku esnan ku tabata gusta aviashon tambe tabatatin JLB. Of esei tabata otro kos?
Robby JLB ta otro kapítulo. Coming Soon
Nos tabata den Jonge wacht Coromoto, parti di Region di otrobanda. Nos barionan Charo, Mundu nobo, St. Helena, Veeris, Wishi, Marchena, Dòmi, Baraltwijk, Colon, Ser’i Otrobanda i Rif, tbtin Leidernan salí for di famianan Bloem, Sofia i Fabian den mundu nobo, Balooche, de Lanooi i Schoop den Charo. E gruponan di Jonge wacht di Coromoto, Santa Famia i Wishi tabata uni ora tin Parade. Nos drumband tbt un kompetensia srrio pa esun di Santa Rosa. Chè de Lanooi tambe tbt un di e “Maîtrenan” famoso. Deftu Coleo tbt un di nos trompetistanan. Dftu Wimbert Scharbaai di Charo i Roland “Yuyu” de la Croes i dftu Boy Sporkslede di Dòmi tbt
nos lead drummernan.
Tbtin tambe e “Mayorettes” di Maria College ku tbt kompañá nos “drumband kobiná” duante Parade. Nos region a pone tambe fiestanan na St. Vincentiusschool organisá pa e.o. Harold Juliana i otro leidernan.
Dushi tempu …!
Ami tabata den Jonge Wacht. Mi ta korda ku tur djarason media nos ta bai ku un di e truknan shinishi bai banda na Brakkeput. Pa informashon, trahadornan e tempu ei di D.O.W. tabatin transport di kas pa D.O.W. i di D.O.W. pa kas. Ambtenarnan tabatin outo of Kabes di Boto.
Despues a lanta kabes outonan di Miami ku dado momentu kasi tur trahadó tabatin un outo i e busnan(truknan) shinishi a ser bende.
Atrobe un balioso parti di nos riku istoria! Danki Percy!
Haloaa bondia ruman.
Hopi dushi tempu.
Ami tabata di Santa Rosa.
E kamper mentu na brakkapoti pega tu e veld pa tras di e skol homber tur afo.
Un par di tempu pasa ma bai dal un keiru eytras gewoon ma kai den lok un ratu mirando kon tempu a pasa i ami komo mucha ku a bai skol di brakkapoti e meneer nan, hunga bala riba e veld despues bai landa OEFfff🤔