Pierre Antoine Lauffer
Un pulchi pa dia
Sabi ku Sokete (aña 70)
Si mi por a logra mata mi konsenshi, lo m’a bira polítiko.
Pa mi biba i obra ku dos kara.
Pa mi gaña yora ku pueblo, ora pueblo ta choka den nesesidat.
Pa mi hari ku konflochinan, ora nos ta sinta seipu i ocha na kualke fiesta, bankete o resepshon.
Pa mi papia di ‘hala faha sera’ i kore na mes momentu den un outo luho i kostoso.
Pa mi yama mi atversarionan kapitalista, miéntras ku mi mes ta hasi tur sorto di negoshi gordo bou di man i riba kustia di e mesun pueblo.
Pa mi ku mi atversarionan hunga e komedia di pleita masha barba den parlamento… pa pueblo tende i dibertí. Miéntras ku ora tin un asuntu ku ta di interes personal.
Pa mi kritiká severamente tur loke pueblo ta kere ku ta gastu eksagerá pero pa mi biaha pa ‘dienst’, meskos ku mi konflochinan polítiko, ora ku mi tin kualke asuntu personal di atendé.
I ora mi bolbe, lo mi konta pueblo, ku mi tabatin vários entrevista importantísimo na interes di pueblo. Pero ku mester para mira kon e situashon ta desaroyá, promé ku mi divulgá detaye.
Pasobra mi sa ku pueblo ta lubidá masha lihé. I pueblo lo no kòrda mas, despues di algun luna, te pa nan puntra mi ta kiko m’a hasi porfin fo’i tera.
Lo mi kore kampaña ku kara hari. Lo mi hasi mi mes simpátiko.
Lo mi kana brasa tur hende. Lo mi karga hopi kriatura riba mi brasa i sunchi nan, presis na e momentu ku mi fotógrafo ta para kla pa saka mi potrèt.
I semper lo mi kòrda riba loke Shakespeare a yama ‘masa’: ‘E mònster siegu ku un kantidat di kabes’. I tambe riba Jones ku a duna e deskripshon: ‘Masa ta ignoransia multipliká’.
P ’esei lo mi obra ku sintimentu i ku mintira ku ta parse bèrdat.
Nunka ku sinti. Pasobra ku sinti i splikashon serio lo mi frakasá.
Lo mi traha riba nan sintimentu. Lo mi konta chiste. Lo mi hasi mofa i chèrchè. I asina lo mi pipita tur e soketenan su voto.
Tur dia den mi korant lo mi bisa pueblo ku ta pueblo ta manda. Pasobra mi sa, ku polítika den demokrasia ta e arte di laga pueblo kere ku ta pueblo ta manda.
Ta klaro ku lo mi duna nan kos… for di nan mes plaka di belasting. Pursi no ta interesá nan di unda plaka ta sali.
I asina lo mi bira riku i biba na mi patarata grandesa.
Basta mi por logra mata mi konsenshi.
Polítiko
Opi
Organisashon Planifikashon Independensia
seudónimo di Elis Juliana
Polítiko
Polítiko sabi mi ta.
T’ami tin ku guia pueblo
kon ta tene e kabuya
pa por subi bai den tòp.
Ta riba ami e ta mira
kon ta hunga saka-fini;
pasa tras di un kontrinkante
i kon ta yob’é ku skòp.
Kon ta kore outo grandi.
Kon ta kome bira gordo.
Kon ta bebe bira sapu.
Kon ta lubidá problema
I ora no tin mas salida,
kon ta mara su mes stròp.
