Modongo
“E wea grandi a para henter anochi riba kandela.Unda ku b’a bira den kas tabatin oló di mondongo herebé. Mi boka a kore awa, seka i bolbe pari awa, pa kome mondongo, mondongo bon leim.
Tur su chochorianan tabata plamá riba mesa den kushina: batata, yams, banana, maishi, preimu, aseituna, alkapara, rasenchi”…. Pierre Lauffer – Wiriwiri 1961.

Mi no ke kuminsá 2026 ku sifra ni plan grandi. Mi promé blog di aña ta algu ku ta mas serka di mi: mi kushina krioyo.
No kushina di restorant, pero kushina di mi kas i sigur esun di ántes. Di mi mama, di tanta, di wela. Kushina di pasenshi, di simplesa i di historia. Mi promé artíkulo ta di kushina, pasobra kisas mi sa ku mi a hasi di mas den dianan ku ta tras di lomba. Ham di Pasku, salmou, pékele, sùlt, ayaka, makrel i asta olibòl, ku tiki tiki tambe ta drentando mas i mas den nos kultura kulinario.

Kushina Tradishonal di Kòrsou

Kushina tradishonal di Kòrsou no ta solamente reseta riba papel. E ta un herensia bibu, traspasá di generashon pa generashon, di mama pa yu, di wela pa nietu. Nos kushina a nase di loke tera por a duna, di loke laman a trese, i di kreatividat di hende ku a siña traha ku tiki, pero ku hopi amor.

Na Kòrsou, kuminda no tabata solamente pa yena barika. Kuminda tabata kultura, ritmo di bida. Kiko bo ta kome, ki ora bo ta kome, ken ta sirbi promé, i kon e wea riba kandela ta uni nos na mesa, tur esaki tabata parti di bida diario.

Nos kushina por parte ta tambe resultado di nos historia. Ideal lo ta, pa nos por kombiná pasado i presente den nos resèptnan, pa e kantidat di paki i bleki kuminda no tapa nos kushina tradishonal. Nada di e kosnan akí ni kosnan nobo no mag di remplasá nos kushina krioyo.

Mi mira awendia kiko nos ta kome i bebe, sigur nos hubentut, bo ta keda realmente babuká. Ki mishi ántes nos lanta mainta sin keinta stoma, sin bebe bo te, yerba òf kòfi, bo papa Quaker Oats, bo dos snechi pan. Awor aki nos ta lanta mainta ku djus òf limonada i dal un pastechi.

Ora ántes bo tabata bai trùk di pan anochi i dal un pan ku yòrki, pan ku rabu, pòrchòp, pan ku steak, pan ku bakiou, pan ku karnisá, awor aki ta dal un filèt di galiña ku batata i karga esaki ku salsa rosada, sous di pinda, hopi mayonès. Of ta dal un “kapsalon”.

Ántes, kuminda tabata parti di e ritmo di bida. Durante siman, kuminda tabata simpel i fuerte. Funchi tabata kasi tur dia e base prinsipal: ku piska, ku bonchi. No tabatin karni tur ora.

Djadumingu semper tabata kushiná ku mas dedikashon, tabata un dia liber i tur hende tabata na kas. Hopi biaha e wea di sòpi no tabata faya riba djadumingu i si tabatin moda, tabatin un wea di stobá banda di wea di sòpi ku riba su mes tabata un kuminda kompletu. Ántes djadumingu tabata parse un dia di selebrashon. E holó mes tabata bisa: awe ta dia speshal.

Komo famia nos tabata sinta kome huntu. Ningun hende tabatin purá. Kuminda di mèrdia tabata un momento di union. Nos mester a sinta na mesa kome, manteniendo tur bon manera di mesa i kome nèchi.

Diferente kuminda tabatin un nifikashon, bonchi por ehèmpel tabata pa habri siman (habri aña tambe) i pa nos tin (na) abundansia. Meskos tabata e kaso, ku bo tabata salga un pan i warda esaki un kaminda entre adrei i kushina, esaki tambe ta tradishon pa abundansia. Sòpi mondongo tabata pa bolbe haña forsa. Tambe tabata un kuminda ku ta prepará pa promé dia di aña.

Kushina manera skol

Kushina di Kòrsou ta un skol di bida. Bo a siña wak, tende, sinti i purba. No tabata tin reseta skibí. Tur kos tabata eksperensia. Nos kushina ta konta nos historia, nos pasado. Diferente pais i kontinente ta reuni riba nos tayó, Afrika, Europa, Latinoamérika i Karibe. Hopi biaha un plato a kuminsá for di nesesidat i a bira identitdat.

Wak kon imigrante a influensia nos kushina. Imigrantenan a trese nan sistema di kome, nan kuminda Kòrsou, kòrda riba ayaka i pan de hamon. E famoso sankocho i aros moro ku ta prònk den bukinan di nos kushina krioyo. E famoso saté ku batata chines.

Imigrantenan di Karibe Ingles a introdusí johnny cake i awor akí rònt Kòrsou tin trùk, òf snèk ta bende johnny cake, yená ku keshi, bakiou, karkó i Dios sa kiko mas.

P’esey, kushina di Kòrsou ta herensia inmaterial. E ta di nos tur, i ta biba solamente si nos sigui traha i pasa esaki pa otro.

Awendia nos kuminda ta kambiando. Mas salú, mas kreatividat. Esei ta bon. Pero progreso sin memoria ta bashí. Nos kushina por kambia, pero no laga e pèrdè su alma.

Mi deseo pa 2026. Lagá 2026 ta un aña kaminda nos sigui honra nos rais. Kaminda nos usa kuminda pa uni hende. Ku kushina di Kòrsou sigui biba, riba mesa, den historia, i den kurason di nos futuro generashon.