E bida di konbento no ta pa tur hende. E hóben ku disidí pa studia i bira pader ta tuma un kaminda difísil, di fe, disiplina i lucha interno. E ta hóben, ku hopi pregunta i ku ainda ta buska realmente ken e ta. E trankilidat di konbento ta un diferensia grandi ku e bida mundano ku el a laga òf ke laga atras: su amigunan, famia, músika, libertat. Miéntras e ta trata di adaptá na bida di orashon, studia i obedensia, e ta sigui lucha ku su duda: esaki ta realmente mi yamada?
Miéntras ku pafó di konbento tin di su amigunan i famia ku no por komprendé e desishon. “Pa kiko mi ruman/amigu”. “Pa kiko e kaminda difísil aki?” Pero den konbento, nan ta siña pa skucha, no e bos di mundu, sino e bos di nan konsenshi.
Hopi biaha e promé anunsio di ke bira pader ta yega serka mayornan, serka pastor na momentu di konfesá òf serka mener di skol. Hopi biaha ta padernan mes tabata esnan ku ta trata na gana alma pa Kristu, dor di resa i pidi Dios pa haña mas alma ku kier bira pader; dor di splika durante lèsnan di katisashi tokante vokashon saserdotal; durante predikashi papia i hasi yamada na hóbennan i pidi nan mayornan pa hasi un apelashon riba nan yunan pa bira pader; i finalmente pa esnan ku no a disidí ainda kiko nan kier bira, pa eventualmente skohé pa bira pader.
Pader Leo van Dijk, den un karta di yüli 1956 ta relatá e situashon den kua nan komo lider spiritual tabatin diferente problema den seminario. Na sèptèmber 1955 “St Pius Juvenaat” a kuminsá ku 7 studiante, promé ku Pasku a drenta 3 studiante mas, i na final di aña eskolar na yüli 56, a sobra 7 studiante. Na 1956, 17 studiante a kuminsá i 4 studiante a bandoná promé ku aña a kaba. Te 1960 diferente studiante a drenta pa sigui nan estudio, pero finalmente na 1960 ku tur bai bin, tabatin solamente 15 studiante siguiendo nan estudio pa bira pader.
Pregunta masha importante ku mester a hasi e tempu ei tabata, kon bin di 1955 pa 1959, 49 studiante so a kuminsá ku nan estudio? Otro pregunta importante tabata: Di 49 ku a kuminsá nan estudio, 44 a bandoná e estudio masha lihé. Aki bo no por a saka afó, kuantu a bandoná e estudio pa motibu ku e estudio tabata difísil òf kuantu a bandoná pa motibu ku e motivashon pa bira pader no tei mas. Un parti difísil semper tabata e idiomanan klásiko. Mirando kon e hóbennan tabata drenta sali seminario, bo por a puntra tambe, ku no mester tabata mas severo ku reglanan pa akseptá studiantenan pa bira pader. No ta un tarea difísil, pa purba hasi muchanan di 12 pa 14 aña pader? Nan a lubidá ku e seminaristanan akí ta mucha nan ta?
Un bon amigu di mi a yega kas i a konfesá su tata ku e kier bira pader i e tata kasi a rementá. Nunka mas e idea ei a kristalisá serka mi amigu.
Ami mes, pa vários aña sirbidó di misa i ku mi tio pastor, nunka a bin riba e idea pa bira pader, ounke ku mi a haña e pregunta ei na vários okashon di e tempu ei pader Wim Ellis.
Den sifranan ku Pader Anink a suministrá ta indiká ku 86 hóben a bishitá e seminario entre 1955 pa aprel 1965. I e temporada ku nan a keda den seminario a varia di 7 dia pa 7 aña. Di e padernan ku a bai Hulanda, ta solamente pader P.B.L Kranwinkel (mi tio) a logra finalisá su estudio, miéntras ku pa Sur Amérika ménos a bai, 10 te máksimo 15 i 7 a logra nan meta: Chapman – Schoonewolf – Ellis – Henriquez – Van Grieken – Römer i Wim Ellis. Por ta ku nos mentalidat di Kòrsou ta mas serka di Sur Amérika/region ku esun hulandes?
Gibi Bacilio, di un forma habrí a konta di su temporada den seminario i su lucha i e bida den konbento; mi ta kere ku Gibi den su kaso, ku su kosnan di “mala mucha” nan tabata soportá, pa motibu ku den loke ta trata su resultadonan di skol, Gibi tabata un bon studiante. Ounke su rebeldia den añanan despues i su motivashon chikí a pone ku el a stòp su estudio.
Otro punto ku tambe tabata konta tabata e preis ku mester a paga pa skol, ku pa e tempu ei tabata haltu.( 95 florin)
Pader Amado Römer a puntra e tempu ei, pakiko ta riba Hulanda nos mester a tuma ehèmpel, i no a wak den region kaminda e estudio ta mas barata.
Dia 21 i 22 di aprel 1965 Mgr. Holterman a pidi i organisá dos dia di estudio (ku partisipashon di entre otro: Pader Amado Römer – Pader Henriquez, Pader Kranwinkel, direktor di Departamento di Enseñansa P.T.M. Sprockel, un tal Sr. J. Rojer, tata di un di e seminaristanan, Pader Leo van Dijk, frater W. Daandels, Pader Anink, drs. C Römer, dosente Kramer, Broeder Jacobus (Shosho), pader Micklinghoff i Jandi Paula, ku komo tema: Un otro sistema pa nos seminario ta posibel i deseabel? Tur representante di Kòrsou den e dos dianan di estudio, a opta pa nos seminaristanan sigui nan estudio pa pader den region i no segun e sistema hulandes.
Jandi Paula a ilustrá e ehèmpel di studiante Otmar Noorden, ku a studia na Mont St. Benedict na Trinidad i ku a bin Kòrsou i mester a bai un aña un klas mas abou na Radulphus College. Por sierto ku e kabayero Noorden aki, a kaba su estudio di mener di skol i a duna nos lès na St. Thomas College i tabata un dosente ku a organisá diferente aktividat pa hóben, inkluyendo su organisashon di Father Flanegen, ku despues a yuda diferente hóben di ménos rekurso sigui nan estudio. E mesun Jandi Paula aki dia 22 di aprel 1965 a hasi un “statement” masha importante bisando: “mi tin miedu ku nos tin e idea, ku si tur pader ta antiano anto e ora ei tur kos lo tabata mihó. Yu di Kòrsou por lo general no ta asina satisfecho ku nan kompatriotanan, ku ta mas haltu ku nan den rango. Ta parse ku nos no ke pa nos mes hendenan guia nos”.
Mgr Holterman tabata hopi desapuntá ku resultado di e dos dianan di estudio akí. El a spera ideanan muchu mas kla lo a sali for di dos dia di estudio. Definitivamente e seminario lo keda i tambe ku Antia mes mester entregá su padernan. Finalmente den aña 1966 pader Boex ta manda e delaster 3 seminaristanan Colombia i por bisa ku esei tabata final di seminario St. Pius
Un Palabra Final
Nos a tira un bista den mundu di seminario, un bista riba hóbennan ku a lucha entre nan yamada i mundu.Mi tabatin akseso na dokumentonan di seminaristanan di Antia, e lista di esnan ku a hasi e eskoho i ku no a yega final. Mi sa ku públiko ta loko pa sa e nòmbernan.
Pero, komo kronista, nos tin un responsabilidat mas grandi ku solamente konta e historia. Nos tin ku respetá esnan ku ta forma parti di dje. E eskoho pa bira (òf no bira) saserdote ta un desishon hopi personal. Publikashon di nòmbernan, espesialmente di esnan ku te ainda ta na bida, ta bai kontra nan privasidat i nan pasado.
P’esei, mi a skohe pa usa e archivo no pa nòmber sino pa e historia. E datonan ta siña nos: hopi hóben a buska nan kaminda den seminario, pero un gran porsentahe a haña nan destino pafó di e murayanan di seminario. Mi a usa nòmber di Gibi Basilio, pasobra mi a kòmbersá abiertamente ku Gibi Bacilio den mi programa na Radio Hoyer riba su eksperensia den seminario.
Esei ta e bèrdat di e historia aki. Ku rèspèt i dignidat pa nan bida. E lucha di nan ta keda di nan, i nan dignidat ta keda na nos pa protehá. Nos ta komprondé nan lucha sin tin mester di menshoná nan nòmber.