Ku nostalgia mi ta kòrda Bèni Leitoe na pisina riba Rif, ku su spòrtbruk blanku i kèts na pia i su T-shirt pegá na su kurpa, kon e tabata grita i duna nos instrukshon den pisina. E tabata konosé nos tur di Mundu Nobo i sa si ya nos por a landa si òf nò.
Mi ta kòrda e wega: “Mi mama a manda mi kumpra un liber di suku. Ki suku? Suku blanku! Ki blanku? Blank’i lechi! Ki lechi? Lech’i baka! Ki baka? Bak’i mondi! Ki mondi? Mond’i yerba! Ki yerba? Yerba bèrdè! Ki bèrdè? Monta bèrdè…” Durante di e rima akí bo mester a tene man di otro i drei rònt den kren. Nos tur nos kabes tabata bira despues.
Papiando di wega, abo a yega di tende òf konosé “zámanakitoki”? Esei ta un wega pa hende grandi. Ku mi a yega di tende di dje, sin nunka mira nan hunga e wega akí.
Mi ta kòrda Shon Nani, Shon Keta ku ta bende pan será. Yaya( di Elis Juliana) ku su kuki i lèter.
Mi ta kòrda Chinè ku benta di li i limonada, Mafita i Pa Nèto ku nan tienda di bentana, Kaitanu ku su toko, Djalia ku benta di ko’i boka dushi; Shishi ku ta bin bende su kosnan na skol; Deborita ku su tienda chikí i Nia ku den bentana tabata bende tur sorto di mangel i otro kos dushi, Bazooka, Lonka, mangel Blue Bird, mangel pera, Mary Jane, zjuip, i e balsnan ku ta bin ku karchi aden, karchi di baseball, di figuranan di sine, di pais ku nan bandera etcetera. I ta e último akí a pone nos yega na e wega Belin.
Belin ta un wega ku mucha hòmber tabata hunga. I tabata un wega basta simpel, pasobra bo no mester di mashá kos. Un pida chumbu, plat i rondó, ku un diameter di mas o ménos 10 cm. Kier men e wega yama Belin i e chumbu plat tambe. Algu ku bo mes mester traha, pasobra no ta bende esaki ningun kaminda. Bo ta buska chumbu tur kaminda, pero nos di Mundu Nobo atrobe tabata bendishoná, pasobra kasnan e tempu ei e liñanan di koriente tabata di chumbu i kasi tur kas di gobièrnu nan a kambia e liñanan di koriente i pone waya i pipanan di plèstik. Kier men nos tabatin chumbu pa parti. Bo ta pone e chumbu den tapadera di un bleki riba kandela i smèlt esaki, ku ta kue forma di e tapadera i kla bo ta. Tabatin mucha den bario ku tabata hunga belin ku pieda plat tambe, pieda plat rondó ku bo ta haña na laman. Anto e belin akí bo ta buska manera pa dal e belin den e belin di e otro muchanan i ora e belin den otro, bo tabata grita: “belin konchoncho”, esaki pa bo ekspresá bo satisfakshon. Den e komposishon Den bo Bèshi di Macario Prudencia e ta kanta i bisa: “Belin Konchoncho, den bo kabes! Ate m’a gana bo, duna mi mi kashupete”. https://www.youtube.com/watch?v=Btq37CSV-s4 . Por sierto Macario ta menshoná mas rima tambe den e piesa ei: “Awa ku suku ta warapa, funchi ku bonchi ta kuminda, lembe ke lembe, lembe lansa djumbala den bo bèshi. Ai zembla katara…”
E reglanan di belin ta bastante fásil. Bo ta tira bo belin basta leu i un otro mucha ta tira di dje den mesun direkshon, purbando di dal esun di bo òf yega mas serka posibel. Bo ta buska manera pa dal e belin di e otro mucha òf buska manera pa bo belin kai mas serka posibel di e otro belin. Ora bo dl e belin di e otro mucha, bo mester span bo dedenan i midi si e belin a kai denter di e área di bo dedenan.Si bo dal e belin i bo ta asina serka ku bo por midi ku bo dedenan bo a gana dos karchi i si bo dal i no por midi ku bo dedenan bo a gana un karchi. Nos tabata hunga mas tantu biaha pa karchi di hungadónan di baseball. Ora bo kumpra un paki di bals, bo tabata haña karchi di hungadónan di baseball. I bo tabata spar e karchinan. Ora bo tin dòbel, e ora ei bo ta kambia ku otro mucha, òf bo ta bai hunga belin pa gana karchi, i kisas e karchi ku bo ta buska. Bo tabata haña paki bals ku tabatin plachi di pais ku nan bandera òf personahe di sine, manera Brigite Bardot, Roy Rogers, etcetera. Despues mi ta kòrda ku mas lat a bin karchi di Pokemon tambe. Por sierto ku e karchinan di hungadónan di baseball a haña un fama mashá grandi i tin karchi ku awor aki ta bal un dineral. Klaro ku tur bo sèn tabata bai na “bubblegum” pasobra bo mester a kou basta bals pa bo haña basta karchi i bo tabata kou bai gol te bo kákumbèin tabata hasi doló. E bals tabata hopi duru i den un ratu di ora e ta pèrdè su sabor.
Pero karamba mi a kou hopi bals e tempu! Esta dushi infansia mi tabatin!
M’a kai den pos! Kuantu pia? 21 pa dies! Ken bo ke pa saka bo? Glenda! Ku kiko? Ku’n sunchi i un brasa!
