Ora un barbulètè pretu grandi presentá na kas, ta bisa segun kreensia, ku e ta anunsiá morto di un miembro di famia.(Sapaté, na bo sapatu! (Reginald V. Römer)

Masha dia mi tin un sèt di artíkulo ku mi kièr a skirbi tokante morto, dia di morto, entiero, ocho dia ets. Mi a skirbi diferente otro artíkulo promé, pero e siman di “Semana Santa”, ku morto di mi ruman Marvis esaki a bira mas urgente pa skibi e artíkulo akí.

Risibí bishita ta algu agradabel, sigur si e bishitante ta un hende agradabel i kerí. Tòg ta eksistí un bishita ku ningun hende ta spera i sigur no, un ku ta bin trese un notisia desagradabel. Awor, kada pais, kada kultura tin su kreensia, su superstishon.

Na Kòrsou nos tin un par di kreensia ku mi kier a kompartí ku bo i ku kisas bo no ta sa di nan, òf bo no ta kere nan, pero echo ta, ku nan ta eksistí i ku ta papia di nan i segun historia oral ta pasa di generashon pa generashon.

Laga mi kuminsá ku e istoria ku a sosodé e djaweps santu ku ta relashoná ku morto di Marvis mi ruman. Na dado momentu mi ta den mi ofisina ta traha i mi telefòn a zona. Atendiendo mi yamada, oma ta atendiendo ku nos nietunan pa prepará nan pa nan bai sali i esun nietu mas grandi ta remarká: oma wak un bestia ku ta trese mal notisia ei. Oma a puntr’é kiko bo kier men i mi nietu mustrando riba un mamundènguè na muraya ta sigui splika: si mamai (su bisawela) a splika mi ku si e ta kabes abou ta mal notisia i kabes ariba ta bon notisia.Kere òf laga,na mes momento,Marcel mi ruman hòmber ta yama for di Ulanda pa pone mi na altura di morto di Marvis mi ruman. Awor ami semper a kere ku mamundènguè, ta bon notisia so e sa trese. Koinsidensia?

Aki na Kòrsou ami konosé e barbulètè shinishi/pretu grandi komo esun ku ta trese e notisia di morto. Nos ta bisa tambe “bishita inesperá”.Nunka mi a preokupá mi kabes pa e bestia akí, ni mi no ta kere den esaki, ounke ku mi sa di su eksistensia i di e kreensia akí. Mi a yega di mira e barbulètè pretu grandi akí, ku ta bin para na muraya, òf den bo kortina di kas. Anto e trankilidat ku e bestia ei ta keda pega na muraya òf den kortina, ta manera kos ku e no tin intenshon di bai nunka mas. I mesora e notisia na kas a kore, ku un hende konosí ta bai laga nos. A sosodé en bèrdat ku notisia di morto di un hende konosí a drenta. Kasualidat?

Nos tur tin di muri, esei ta un echo i solamente nos ta spera ku lo dura basta un ratu mas. Morto, meskos ku nasementu ta parti di bida.

Un barbulètè pretu ta señal di bishitá di un morto ku ta bai kai i den Sambumbu, Pader Breneker ta yama esaki: barbulètè di morto. Si e ta diki/gordo un hende hòmber lo muri i si e ta fini, esaki ta nifiká morto di un hende muhé.

Tin mas señal di bishita. Si un raton djanochi bula drenta bo kas, esaki ta un mensahe di morto e ta trese. Awor ta tin un tempu ku e bestianan akí ta drenta nos kas sali ku frekuensia, awor si mi bai tras di e kreensia akí, awor akí lo mi no tin famia mas. Pader Breneker ta sigui ku mas kreensia: si bo mira i skucha un chuchubi fleit, bula bai laira, bin bèk tera i kai drumi riba su lomba ku pia den laira, esei kier men ku pronto, masha lihé un hende di bo lo muri.
Tin otro hende ku ta haña bishita di e persona na kas, esta nan ta mira su spiritu ta dualu den nan kas.

Por último, Pader Breneker ta menshoná “kinipí di morto”, esaki ta un sla ku direpente bo ta haña na bo kurpa i ku ta nifiká ku un hende ta bai muri pronto i a kinipí bo.

E asuntu di e barbulètè pretu grandi ei ta keda un misterio. Mi sali den mi kura, mi ta mira regularmente un kantidat di diferente sorto di barbulètè, hel, bèrdè i otro kolónan bunita. Pero un barbulètè pretu grandi asina, nò, esei ta solamente ora di bishita mi a mira.