Ketu bai bo ta haña ekspreshonnan, ku nos tempu tabata e mihó tempu i sigur mihó ku awor aki. Esei ta pasobra nos ta bai bèk den tempu i rekordá nos tempu, ku nos a biba asina intensivamente i ku nos tin asina grato rekuerdo. Final di dékada 60 i kuminsamentu di dékada 70, mi tabata traha na “Parket Procureur Generaal”. Mi a kaba di eksperensia 30 di mei 1969 i mi tabatin solisitut pendiente pa polis i tambe pa bai traha na “stadhuis”. E tempu ei ora bo solisitá pa polis, bo ta haña bishita na bo kas pa nan bin wak kon bo ta biba, ku ken bo ta biba i kon bo kas ta etcetera. Mi tabata den nesesidat di trabou, pa yuda na kas, kaminda mi mama tabata hasi todo lo posibel pa mantené kabes riba awa. Den kas ku 7 ruman mas, esei no tabata un tarea fásil i papai no tabata kooperá mashá bon tampoko.Por sierto ku papai no tabata biba na kas ku nos e tempu ei. Mi a solisitá na “Parket Procureur Generaal” tambe i haña yamada pa kuminsá traha mesora na Parket.

Trahando den edifisio di stadhuis, mi tabata rondia Punda henter siman. Den un grupo di amigu/kolega di trabou, nos tabata para bou di HBU – Hollandse Bank Unie (kaminda parlamentarionan ta sinta) i nos tabata wak damanan elegante ku tabata traha den Punda sali trabou i basha nan ku piropo.Nos mes, bistí ku kamisa i dashi, pasobra esei tabata e sistema di bisti e tempu ei pa traha komo ámtenar den gobièrnu. Djaluna, djárason i djabièrnè mi tabata bai HBS anochi di 6 pa 9or. Nos a krea un folklor di para den Punda i atmirá beyesanan ku tabata sali trabou atardi for di The New Amsterdam Store, Spritzer and Fuhrmann, Wulfsen & Wulfsen, Boutique Aquarius, Boutique Tops etcetera. Tiki tiki e ambiente aki a bai ta krese i nos a kuminsá bishitá Punda riba djasabra tambe i asina forma e konosido ambiente di Gomezplein riba djasabra. Nos ta bai “groove” riba Gomezplein. Tin hende ku lo papia di e famoso Gomezplein, miéntras otronan lo ekspresá nan den forma di e notorio Gomezplein. Nos tabata hasi tur e kosnan akí dilanti i tras di lomba di e gran Yu di Kòrsou Doktor Da Costa Gomez.

Ta temporada ku nos boka tabata yen di “psychedelic – ku nos tabata swing – nos tabata basilá – kos tabata freak – òf kos tabata groovy”. Ta temporada di High Flying Park,  temporada ku nos tabata bisti dashiki, karson bell bottom, sapatu godfather, kamisa “body fit” di Boutique Aquarius, nos ta mira Soul Train, i riba nivel internashonal, tabata asosiá nos ku moveshonnan di Dolle Mina, hippie, Black Power, Woodstock i Angela Davis, hotpants i unisex tabata na moda, Flowerpower, mariwana, hash i LSD a hasi nan entrada, Riba Gomezplein nos tabata topa kasi tur djasabra ku Baka di Marchena, ku su radio grandi riba skouder i ku su bailá ekstrabagante; nos tabata topa ku Carlito Gomez e konosido pintor i aktivista, Stanley Brown, Angel Salsbach, Freddy Antersijn, Baas Plezier (polis), George Baker, Papa Godet, polítikonan di partido Nashonal, Demokrat, URA, Frente tabata bin buska voto riba Gomezplein. Nos tabata lesa Vito, pasobra nos tabata revolushonario  òf tabata hasi komo si fuera. Pa nos Gomezplein tabata “the place to be” riba djasabra atardi. Si bo no tabata riba Gomezplein djasabra atardi, antó“ bo no ta konta.

E tempu ei tabatin un lucha tenas entre nos, hóbennan, i e komersiantenan ku no kier a mira nos na Gomezplein, pasobra supuestamente nos tabata stroba nan negoshi i nos no tabata kumpra nada segun nan. Nan a hasi tur loke tabata na nan alkanse pa kore ku nos for di Gomezplein. Esaki a trese un tenshon enorme i asta a yega asina leu ku tabatin konfrontashon entre polis i hóbennan. Hopi biaha, polítikonan i aktivistanan manera Stanley Brown, Papa Godet, Mac Alberto, George Baker i otronan tabata sali na nos defensa. E tempu ei, polis tabata patruya ku nan kachó riba Gomezplein.

Tabatin algun komersiante, entre otro esnan di The New Amsterdam Store, Boutique Tops, i Caribbean Audio Supplies N.V. ku tabata ekspresá nan mes masha negativo tokante nos hóbennan. Den kuminsamentu di e artíkulo mi a papia di nos tempu, i  komersiantenan tabata papia di e generashon di nos, komo generashon pèrdí i meskos ku nos ta papia di e generashon aktual, ku nan ta e generashon pèrdí.

Amigoe 17 di ougùstùs 1973 un komersiante: “Mi ta kontra e hubentut ku ta bishitá Gomez Plein, nan no tin nada di hasi akinan. Wak e trankilo soul brother ei, ku un kara di yo no fui sin trabou, pertenesiendo na NDC (nothing doing corporation). Abo ta kere ku e mester ta aki? E mester bai traha i paga belasting, mihó kos ku e por hasi. Tempu di mi tempu, mi tabata hunga bala, dominó, ahedres òf mi ta bai buska un mucha muhé, pero mi no tabata kana rònt òf sinta pòrnada”.

Den e mesun korant algun hóben, bistí a la hepi, ta opiná: “Polis ta trata nos mashá malu mes,tur hende blanku òf pretu nan ta papia mashá mahos, bisando nos: Kabayeronan “get lost”. Nan mester papia mas nèchi i bisa nos: tende aki noble, bo por lanta for di aki? Esei ta otro. Nan ta papia na un manera ku ta provoká i nan ta mashá lihé pa saka klòp. Pero esei no ta bon, nan ta muri masha chambòn, nan ta muri ku wowo habrí i ta nos tin di sera nan wowo e ora ei”.

E diferensia entre generashon e tempu ei tabata notabel i ku tipo di aktitut di e komersiante (adulto) i e hóbennan akí, a hasi e situashon pió i konfrontashon inevitabel. Hóbennan a disidí di organisá den un aliansa i pa un tempu a bòikotiá Punda, dor di no bai Punda i no hasi kompra den Punda. Sigur ta tambe, ku algun hóben tabata usa droga, hunga plaka riba  kaminda públiko i tabata stroba hende di kana i hasi kompra den Punda.Gobièrnu di Kòrsou a hasi un intento pa saka hóbennan for di riba Gomezplein i manda nan Wilhelmina Plein, pero e plan akí a frakasá rotundamente.

Polítika a probechá masha bon mes di e ambiente di Gomezplein i nan tabata bin kore kampaña riba Gomezplein, mi ta kòrda kon partido Demokrat tabata presentá ku nan “brigada kòrá” den jeep riba djasabra.
Polis a pidi miembronan di Frente Obrero, pa no bin Gomezplein den unifòrm di Frente. Tabatin aktuashon di bitbènt, i karanan manera di Ricardo Elhage, Petrus van der Veen, Promé Minister di e tempu ei, Ernesto Petronia, Chicho Jonckheer, Rufus Mc William bo ta tabata mira ku frekuensia. Mac Alberto a organisá diferente akshon, meskos ku Stanley Brown i Frèddy Antersijn. Diferente akshon a kaba den detenshon di e aktivista organisadó.
A probechá tambe di aktividat djasabra riba Gomezplein, ora ku organisadónan a manifestá kontra eventual postulashon di Efraïn Jonckheer komo gobernadó di Antia.

Brigadada Kòrá

Polisnan ku e tempu ei tabata popular riba Gomezplein tabata entre otro, Feo Sulvaran, Baas Plezier, J. Th. Sprockel i inspektor Heiligers.

Mi a kome i bebe na Lido i Formosa Restourant, mi a kumpra paña na Boutique Aquarius, mi tabata skucha disko na La Bonanza i tòg mi mester rekonosé ku riba djasabra ora mi bai Gomezplein, mi tabata bai simplemente pa “hang-out”, pa kòmbersá ku mi amigunan, pa basilá, pa swing, pa wak mucha muhé. Karamba Gomezplein tabata dushi e tempu ei!