Den korantnan bieu, mi a haña aña 1816 e promé menshon di vürwèrk na Kòrsou. E selebrashon akí tabata na okashon di selebrashon di fiesta di un miembro di Kas Real. Mi mester bisa ku ta for di e tempu ei na vários okashon tabatin selebrashon ku vürwèrk. Anto na diferente okashon, pa aktividatnan privá, selebrashon aña di reina, selebrashon relashoná ku fiesta katóliko i protestant i na diferente okashon en konekshon ku aktividat di marina. Mayoria biaha tabata personal di marina ku tabata enkargá ku show di vürwèrk na Kòrsou.

Chinesnan den siglo 13 a kuminsá hasi diferente prueba ku pòlbu Nan a traha diferente tipo di vürwèrk i a krea tur sorto di efekto. Nan a hasi diferente prueba ku e forsa di eksplosivo. Nan a manda nan invento rònt mundu i asina mundu tabata disponé di vürwèrk. Na Kòrsou nos ta mas konosí ku vürwèrk na fin di aña. Últimamente nos tin vürwèrk riba djaweps ku Punda Vibes i tambe ora tin selebrashon grandi riba Awasá, Dia di bandera, salida di barku for di haf i otro selebrashon spesial.

Kòrsou tabatin diferente kompania ku tabata enkargá ku importá tur sorto di vürwèrk, nos tabatin Moo’s Grocery, i nos tin Goon Lee, Alivio i algun otro empresa ku ta importá vürwèrk. Moo’s Grocery na aña 2012 a stòp ku importashon i ku show di pagara.

Afon Moo, un Yu di Kòrsou, di desendensia chines a konta nos di su historia i embolbimentu pa loke ta trata vürwèrk. Afon su mayornan a kuminsá bende i pone show di vürwèrk i el a sigui ku e tradishon akí. Nan negoshi ta na Caracasbaaiweg i su famia ta kontá entre e pioneronan pa loke ta trata importá vürwèrk i pone show di pagara. Mas o ménos 65 aña pasá e tradishon a kuminsá na momentu ku mayornan di Afon a kuminsá bende i pone show di vürwèrk. Pa e tradishon no bai pèrdí Afon a disidí pa sigui kuné i mantené bibu. Afon ta konta apesar ku a bin mashá hopi kambio mes, tòg el a perseverá i a sigui ku e tradishon akí te 2012.

Meskos ku pa nos aki na Kòrsou, pa chinesnan tambe ta konta, ku e intenshon di vürwèrk fin di aña ta pa kore ku tur loke no tabata bon i drenta e aña nobo yená ku energia i positivismo.

Moo’s Grocery tabata hasi konekshon komersial pa kumpra vürwèrk na China. Na China nan ta paketá e pedida i transportá esaki ku barku pa Kòrsou. Na yegada na Kòrsou duana ta kontrolá e kònteinernan i kobra impuesto i na momento ku duana duna aprobashon por transportá vürwèrk pa Kruithuis.

Ta kompañá e kònteinernan pa Kruithuis, i promé ku hasi esaki tin di kontrolá tur kònteiner i trèker pa sigurá ku nan ta den bon kondishon. Afon ta konta ku semper seguridat ta mashá importante.

Ta momentu ku yega Kruithuis un miembro di duana ta kita e seyo di e kònteiner di manera ku e doño ta haña akseso na su vürwèrk. Un eksigensia ta, ku kada bes ku bai saka vürwèrk mester tin un funshonario di brantwer presente pa supervisá e trabou. Tur tipo di vürwèrk ta peligroso i p’esei mester bai semper ku kuidou. Den e di dos siman di desèmber nan tabata saka vürwèrk for di Kruithuis i stiwa esaki den e negoshi ku ta bai bende. Moo’s Grocery tabata manda pa tur rebendedó un lista pa nan yena kua tipo di vürwèrk nan ta deseá na kumpra. Ora ku kaba ku e trámitenan akí nan por pasa paga i tuma nan vürwèrk dia 27 di desèmber, ku ta e dia ku por kuminsá bende vürwèrk.

Vürwèrk ántes i awor

Manera Afon a bisa kaba, durante añanan tabatin mashá hopi kambio mes, i e kambionan akí a bin pa motibu di desgrasia ku tabata sosodé i tambe riba protesta di siudadano pa loke ta trata seguridat di/i zonido duru di vürwèrk. Kambio ku e meta pa yega na bendementu i tiramentu di vürwèrk mas responsabel. Kambio por ehèmpel pa wak vürwèrk pa mucha i ei a bin e kambio pa pakete di mucha ku ta konsistí di galiña, tanki di guera, dal abou, strea i klapchi chikitu. Loke semper tabata bende hopi tabata i te ainda ta pagara, ku tantu komersiante komo kas di famia ta kumpra. Un kambio ku sigur hopi hende a aploudí ta e kambio ku a stòp di bende e konosido nightshell ku públiko, pa motibu di aksidente kaminda morto a kai. Solamente den show grandi por tira nightshell. Mi a komprondé ku awor mester pidi un pèrmit spesial pa importá e tipo di vürwèrk akí. Por sierto ku mi no ta komprondé, kon ántes tabata bende e konosido “martin”. Un bari chikí shinishi ku mecha bèrdè. Komo mucha nos tabata kana den bario dia promé di yanüari i kana buska klapchi ku no a tira, kibra nan i yena pòlbu den tubu, bleki i mi no sa kiko mas, pa traha nos propio vürwèrk, ku tur peliger ku esaki tabata trese ku ne. Bo ta kòrda e “Maria Porko Sushi”?

Ántes no tabatin kasi propaganda mes pa benta di vürwèrk, solamente ki dia ta kuminsá bende vürwèrk, pero pa motibuku Kòrsou a haña mashá tantu rebendedó, bo ta skucha na radio tur dia den desèmber na unda bo ta haña e mihó surtido di vürwèrk pa e mihó preis. Pa kolmo e aña akí tin manera un krísis pa loke ta trata importashon di vürwèrk.

Kòntròl

Kòntròl ta tuma lugá awendia muchu mas riguroso, kaminda un tim di eksperto di Kruithuis, brantwer, milieudienst i DOW huntu ku rebendedónan ta kùr vürwèrk. Nan ta tuma muestra di kada tipo di vürwèrk pa kontrolá kon duru nan ta tira. Esaki tin di tuma lugá promé ku duna lus bèrdè pa kuminsá ku bendementu di vürwèrk.

Show di vürwèrk

Komo tradishon di mas ku 50 aña Moo’s tabata tene su show di vürwèrk di fin di aña riba di dos dia di Pasku. Esaki tabata tuma lugá dilanti di Moo’s Grocery. Manera Afon a splika e show tabata pa yama pueblo di Kòrsou danki pa a kumpra henter aña serka nan. Promé ku kuminsá ku show di vürwèrk tabata pone aguinaldo i brasbènt i nan a yega di pone tambe e konosido baile dramatisá chines, Lion Dance pa entretené públiko. Pa e tipo di show akí bo mester di pèrmit spesial di polis i brantwer mester pasa i kontrolá promé. Afon ta sigurá ku pa bo disfrutá di vürwèrk ku ta bai laira, bo mester para mas patras. Despues di 2 di yanüari mester warda tur vürwèrk atrobe na Kruithuis te siguiente aña.

Desèmber 2012 Moo’s Grocery a pone un punto final na benta i show di vürwèrk, asina Afon a sigurá nos.Ta e aña ku tabatin e eksploshon na Kruithuis, ku a kosta bida di e persona ku semper tabata enkargá ku e shownan di pagara di famia Moo. Nan a evaluá e situashon i a disidí di pone punto final tras di benta i show di vürwèrk. 2024 Ta un aña ku tin problema ku importashon di vürwèrk, pa motibu di transporte marítimo.

Ounke ku lo tin ménos vürwèrk, loke pa hopi ta un duele i pa otro nan lo ta un bendishon, mi ta spera ku bo lo tin un tremendo kambio di aña. Ami figurativamente mi ta pone un show di pagara pa bo, ku a kompañá mi durante di aña 2024. Ami, pa loke ta trata mi blog mi no tin nada di reklamá, pasobra bo a duna mi e atenshon nesesario i mi ta yama bo danki ku bo a lesa mi artíkulonan fielmente. For di Cali, Colombia, mi ta desea bo un tremendo kambio di aña i un super 2025.