Maske Campo Alegre tabata un tema kontroversial, e tabata un realidat ku a surgi for di sirkunstansianan sosial/ekonómiko di su tempu, i ku nos tabata tolerá.
Campo Alegre
“De hoeren van het eiland groepen
keurig tezamen in een kamp
want tussen deftige beroepen
in nette stad zijn zij een ramp…”
Hein Roethof, Antilliaanse Sonnetten.
Na un lugá poko aisla, ta eksistí un lugá ku hopi hende konosé, pero poko hende sa su berdadero historia: Campo Alegre. Un lugá ku tin algu misterioso, hopi famá i ku ta forma parti integral di historia moderno di Kòrsou. Pa un grupo e tabata un espasio di libertat. Pa otro e tabata un bèrgwensa públiko. Pero tur hende ta rekonosé ku Campo Alegre tabata un fenómeno úniko den e bida sosial di nos isla.
Kuminsamentu di Campo Alegre (1949)
Campo Alegre a habri riba 7 di yüni 1949, den un tempu ku Kòrsou tabata kambia rápidamente. E desaroyo grandi di Shell ku a trese míles di hende, hende hòmber, pa traha na Kòrsou. Den mi artíkulo anterior tokante Shell mi a trata e influensia di Shell riba nos struktura sosial di Kòrsou, partikularmente den e segregashon ku Shell a fomentá. Pero Shell a hunga un ròl importantísimo den establesimentu di Campo Alegre. Ku kresementu ekonómiko, a bin tambe un kresementu di nos poblashon, prinsipalmente di trahadónan hòmber, tantu lokal komo internashonal. Esaki a kondusí na un kresementu di prostitushon den kayanan di Kòrsou. Outoridat kolonial i lokal tabata preokupá ku órden públiko i ku nos salubridat. Asina e deseo a nase pa regulá i kontrolá e aktividatnan akí.
Iglesia Katóliko, ku su influensia (moralidat) grandi den nos komunidat, a hunga un ròl krusial (dudoso) den e debate rònt di prostitushon. Ounke Iglesia katóliko tabata kontra prostitushon, for di punto di bista moral, Iglesia Katóliko a rekonosé ku e realidat tabata ku Kòrsou tabatin un problema ku prostitushon. P’esei nan a opta pa un strategia “ménos malu”, apoyando e idea pa konsentrá aktividatnan di prostitushon den un área spesífiko i bou di supervishon estrikto, pa asina minimalisá efektonan negativo pa nos komunidat.
Pues bou di preshon di Iglesia Katóliko, gobièrnu huntu ku outoridat médiko i polisial a tuma e desishon pa establesé Campo Alegre riba nos isla. E lugá akí tabata un kompleho será i kontrolá, situá pafó di sentro di siudat, spesífikamente pa e propósito di prostitushon legalisá. Pa mantené prostitushon for di nos bida diario di famianan di Kòrsou. Iglesia Katóliko a insistí riba reglanan estrikto pa e operashon di e sentro, inkluyendo kontrol médiko regular pa e muhénan i e prohibishon di alkohòl den área di trabou.
E idea di habri un zona di prostitushon kontrolá tabata un manera pa:
- Prevení enfermedatnan venériko,
- evitá prostitushon ilegal den bario,
- i pa manten’é “pas sosial” riba nos isla.
Na mesun momentu, tabata un manera pa duna trahadónan di Shell un alivio seksual, sin ku esaki tin di bai a kosto di nos famianan lokal. Pa Shell, un lugá manera esaki tabata nesesario pa mantené e ambiente di trabou stabil. Un trahadó kontentu ta un trahadó produktivo. Shell tabata un poder ku no por a ignorá.
Diskushon Moral
E desishon pa habri Campo Alegre no tabata fásil. I ounke Iglesia Katóliko, ku tabata tin hopi poder den komunidat, den kuminsamentu tabata fuertemente kontra, ounke ku obispu di Willemstad a yama e idea “skandaloso”. Gobièrnu di Kòrsou a skucha ekspertonan di salú i tambe bou di preshon di Shell, a disidí ku Campo Alegre ta bin.
Den komunidat mes, tabata tin hopi duda. Tabata un tema di “tira piedra, skonde man”(Hasi malu,ora otro no ta mira – Sapaté, na bo sapatu! Reginald V. Römer) .
Un detaye masha importante: e damanan ku tabata traha den Campo Alegre no tabata di Kòrsou, sino ku tabata bini di Colombia, Repúblika Dominikano, Venezuela, Cuba etcetera. Esaki a hasi e tema mas tragabel pa nos hendenan lokal.
Kon Campo Alegre tabata Funshoná?
Campo Alegre no tabata un kas di plaser skondí. Tabata un área, ku un kasita pa kada muhé, sistema di kontrol médiko, seguridat. Tur kliente mester a sigui regla, i e sistema tabata manera un pueblo chikí riba su mes. Pa hopi muhé, esaki tabata nan fuente di entrada ku tabata reglá via un kontrato legal. Campo Alegre tabata solamente aksesibel pa hende hòmber mayor di edat.
“Dinsdagavond Elf uur ‘s avonds. Campo Alegres Ladies night. De enige avond waarop vrouwen het afgelegen bordeel mogen binnengaan. Voor vijfentwintig gulden, dat is vijftien gulden meer dan de mannelijke gasten betalen, betreden ze het domein dat meestal alleen voor hoerenlopers en bewonderaar van vrouwelijke naakt is weggelegd”… (Nelly Rosa – Amigoe 29 april 2011).
Campo Alegre tabata un atrakshon turístiko i tabatin un fama internashonal: Experience the vibrant nightlife of Willemstad at Campo Alegre, a premier night club offering exhilarating entertainment and a lively atmosphere. https://evendo.com/locations/curacao/julianadorp/nightclub/campo-alegre E página wèp akí tabata aktivo na momento ku mi tabata skirbiendo e artíkulo akí.
Aruba tambe tabata ke un Campo Alegre!
Aruba, den mes periodo, tabata sinti pa un idea similar. Tin dokumento históriko ku ta mustra ku Aruba tabata purba sigui e mesun ehèmpel. Pero, e resistensia di Iglesia Katóliko i komunidat Arubano tabata masha fuerte i Aruba no a logra pasa e plan.
Poko poko ròl di Campo Alegre tabata desaparesiendo. Ku e yegada di pandemia COVID-19 den 2020, Campo Alegre a sera definitivamente. Na sèptèmber 2023 Gobièrnu di Kòrsou a kumpra Campo Alegre ku te asta dia di awe ta será.
Campo Alegre ta un ehèmpel den nos historia, ku ta mustra kon nos a trata tabúnan manera prostitushon, sèks, poder,ekonomia, i moralidat. Un refleho di kompromiso entre práktika i prinsipio.
Campo Alegre tabata un produkto di su tempu. E ta un parti di nos memoria kolektivo, ku nos por skohe pa lubidá, òf pa usa pa komprondé nos mes mihó.
“Si ta nèrvio tin, mener- Bai kamper:
Ta plaser bo tin mester,
Difikultat bo tin ku wer,
Min’tin keber, min’tin keber
Bai kamper”. Rignald Recordino – Bai kamper.
Bay Kampeer — Doble R SSS (1982)
