Mgr. Willem Ellis: Esei ta nos futuro, den kada kaya un ofisina di number, un misa i un snèk.(Amigoe 22 di desèmber 1987)

Nos tur konosé un snèk na Kòrsou, sea ku bo a bishitá e snèk òf e ta den hanchi di bo kas. Snèk ta un fenómeno ku a integrá den nos komunidat i a bira un supkultura den nos sosiedat. 

Pa kuminsá laga mi pone bon kla, ku no tin un studio hasí di e fenómeno snèk i kon esaki a originá. Defuntu Gezaghèber Ronald Casseres a bisa ku snèknan a kuminsá riba nos isla, pa motibu ku lei a laga buraku habrí ku nan por a kuminsá operá.
Pa bende bibida pa bai ku n’e i bebe otro kaminda, no ta tin mester di pèrmit. Pero pronto bo a haña un kos di habri bòter kologá na un hilu/kabuya un kaminda i hendenan a kuminsá para ei mes i bebe. Mas despues a kuminsá pone tambe pastechi den un skalchi i bo por a haña un sèntwich tambe. Un frishidèr bieu, un mashin pa tene kos kayente, refresko i hopi serbes ta loke bo ta haña na un snèk ántes. Mayoria di snèk ta den barionan di pueblo i aparentemente ta tin di aber ku e echo ku trahadónan ta buska algu di kome durante ora di trabou i snèknan ta bende kuminda tambe. Nan ta bisa ku t’aki e bendementu di kuminda chikí a start. 

Snèk, snack, snackbar

Ta despues di esaki snèknan a bira mas moderno i a amplia nan surtido di bende, ku mas kos. Den un investigashon ku mi a hasi, ta te den añanan sesenta mi a bin topa ku e nòmber di “snack” i “snackbar”, i aki e ta mas usá den kombinashon ku ’n hotèl i tambe toko Zuikertuintje ku ta tin un “snackbar”.
Mi ta un di nan ku ta kere fielmente den e ponensia, ku ta ku yegada di snèk, ku interes di hòmber di shap/bar a bira mas chikí, dor di bende serbes mas barata, pero prinsipalmente pa motibu di presensia di e poyoyonan latino na e snèknan. E damanan ta trese mas ambiente i esaki a bira e atrakshon pa e hòmber, pa buska su plaser for di kas, na e snèknan, kaminda e serbes ta bon friu i mas barata ku otro kaminda. A sigui diferente invershon mas moderno den snèk: a pone banki pa sinta, a bin ku televishon, por a hunga dominó, mashin di hunga plaka, por a baila i ta toka  müzik live (tambú i aguinaldo) tambe.

Na aña 2008/2009 ta tin no ménos ku 327 snèk inskribí den registro di CBS (Ofisina di Statistik), na 2017 ta tin 131 i den 2020 tambe 131. E benta kolektivo di snèknan den 2006 ta di 20 mion florin. Den dékada 80 ta tin un kresementu eksplosivo di snèk na Kòrsou ku a trese tambe un kantidat grandi di problema pa Kòrsou. No solamente pa Kòrsou, problemanan tabata dje grandi ei, ku ta tin un seri di reunion di gezaghèbernan di Aruba, Boneiru i Kòrsou, pa frena e kresementu ku a sali kompletamente for di man.

Kriminalidat a sali for di man, benta i uso di droga a sali for di man, wega di plaka a oumentá, sushedat rònt di establesimentunan di snèk, nos pueblo a kuminsá kome ménos salú i asina por menshoná mas problema, ku tur nan ta atribuí na yegada i presensia di snèk riba nos isla. Notabel si ta e notisianan di hendenan ku nan a arestá na un snèk, asesinatonan ku ta tin na snèk i kantidat di pelea ku ta tin i ta originá na un snèk.
A adaptá i introdusí diferente medida: a kambia orario pa habri i sera snèk; a introdusí un otro pèrmit pa snèk etc. etc. Gezaghèber i ministernan a papia pro i kontra di snèk, a hasi tur sorto di kos pa baha kantidat di snèk, pero nada no por a kita e popularidat di snèk.

Minister Stanley Inderson den Amigoe di 7 di sèptèmber 1988: Loke mi ke ta para e kresementu aki ku a sali for di man: Mi no ke pa den kada un kaya tin un ofisina di number, un snèk i un “uitzendbureau” e tempu ei den su lucha kontra uitzendbureau, pero menshonando e snèk den mesun rosea. 

Aña 2021, e fenómeno snèk tei ainda, kisas no e bentana ku ta bende dos pida kos, pero awor den un forma mas moderno, e snèknan protehá pa trali di heru, i poko poko e snèk a kuminsá konsentrá diferente otro aktividat i ta bende tur sorto di otro kos. E kombinashon di snèk i supermerkado/minimarket a bira algu masha normal i hopi snèk a kambia di doño i a kai den man di chinesnan. 
Hende muhé masha tiki biaha ta bishitá snèk, ounke nan ròl na snèk ta grandi, pasó pa motibu di hende muhé, e hòmber ta bishita e snèk. No tabatin (no tin) masha muhé Kurasoleño ta traha na snèk.

Ponensia: na snèk si un hòmber bin den su ketelpak, sushi na semènt òf zeta, e muhé latino ta baila ku n’e, karisi’é, e muhé Kurasoleño no ta ni drei wak’é.(saká for di Snèk Book di Herman Van Bergen en anderen).