Banda di hunga e weganan tradishonal, kanta, balia tròm, hunga ninichi, dukla, fula pòls, ‘polis en dief’, hunga djèks, dominó, karta, ‘mens, erger je niet’, ‘monopoly’, bula konènchi, blenchi man, bula kabuya, bala kontra muraya, hunga ku pòpchi di bòter kabei di kabuya, pele ku eseinan, nos (e muchanan di Auchi) tabata bai landa na un playa na Bándabou òf na Jan Thiel djasabra òf djadumingu. Na kas nos tabata hunga skol, siña otro pida pida kos kon mester komportá, kanta masha hopi mes huntu i toka disko di Trio los Panchos, Los Diamantes, Sonora Matancera, Billos Caracas Boys i balia. Nos a yega di haña un seri di lès di balia tango serka Isaac de Windt, ku komo pareha algun yònkuman di Otrobanda di ken nos hendenan tabata konosé nan mayornan. Anto baimentu di sine di mi infansia te mi adolesensia tabata un di e divershonnan masha dushi mes na siglo XX.
Mi tabata úniko yu, pero nunka m’a sinti mi so. Mi tabata bai hunga kasi tur dia na kas di mi mama su mihó amiga Aura, bibá na skina di Bargestraat/Werfstraat, Skalo Abou. Auchi tabatin un yu muhé, Tita, i el a kria algun mucha muhé mas, anto tuma ainda sinku ruman for di Venezuela ku tabata biba na su kas pa nan bai skol na Kòrsou. Nos tabata kasi semper un dozein di mucha, pasobra tin bia tabata bini dos ruman muhé mas i un mucha muhé tímido bin hunga na kas di Auchi.
Auchi tabata tene buki na un negoshi pegá ku su kas. Komo trabou èkstra e tabata bende karchi di entrada na Cinelandia, i p’esei su muchanan, tabatin tarheta kolektivo liber pa drenta bai mira sine na Cinelandia i Roxy (tur dos teater di mes doño). Den kaso spesial, nos un poko mas grandi ku sobrá, tabata bai West-End djadumingu mainta 10.30 or, pero e ora ei mester a paga. Komo shaperòn, Tita su yaya Yoy òf su yaya Angela, mama di Bonnie tabata bai sine ku nos tur.
Un kuèrdè di mucha tabata bai sine djasabra i djadumingu. Tabata gezellig. Tabata tempu di pelíkula di kòbòi i di Tarzan. Pero tambe di pelíkulanan dramátiko manera El derecho de nacer, Red shoes, An affair to remeber, The Ten Commandments, A streetcar named desire i tur aña atrobe Pashon di Kristu ku tabata pone nos yora. Si e mashin ku ta pasa e pelíkula pega, òf si koriente bai, bo ta tende gritu duru: ‘Popooo, oh Poppooo ei! Shon Popooo!’ Tabata nòmber di kariño di un di e doñonan, Don Próspero Moron.
Mi primanan kende a bai studia na Merka a bin pasa fakansi na Kòrsou i nan no por a komprondé e gritamentu. Meimei di pelíkula tabata sali tin bia riba pantaya mensahe ku tin telefòn urgente pa tal o kual hende. Si e mensahe sali di dos be pasobra niun hende no a reakshoná, un hende den sala ta grita duru atrobe: El a bai wc…..!
Nos tabata haña potatoe chips òf eiskrim di Ritz, limonada kòrá, Orange Crush òf Coco-Rico. Dilanti di Cinelandia tabatin un señora ku lensu di kabes mará ta bende kos dushi di Kòrsou i pinda herebé. Semper tabatin hopi hende na sine, tambe e venezolanonan di e merkado flotante di barku di fruta for di Venezuela. Nan tabata sinta abou na airu liber i nos tabata sinta ariba bou di dak.
Den e añanan di adolesensia nos tabata probechá baimentu di sine pa chèk yònkuman, anto tur e kandidatonan tabata haña nòmber di kariño manera: Chesterfield, Lucky Strike, Napoleon, Mario Lanza, Errol Flyn, Rock Hudson, Gregory Peck. Pero e chèkmentu ei ta djaleu i ku rab’i wowo, pasobra semper tin un òf dos shaperòn huntu ku nos. Un bia na Roxy, mi kandidato a sinta mi tras anto nos pianan por a karisiá otro un ratu asina. Ami komo mucha di 14 aña, yen di miedu pa shaperòn no mira anto bai konta na kas.
Percy, aplouso ku bo ke registrá historia di tur e teaternan di Kòrsou. Mi ta konvensí di bo éksito. Masha hopi plaser durante e trabou ku meresé un etikèt spesial: ‘Amor patrio!’
Lucille Berry-Haseth
02-11-2021
Dushi pa lesa historia bunita di antes danki Percy y Lucille Berry Haseth