Tin hende ku ta bira famoso. I tin otro ku ta bira símbolo. Pa Kòrsou, Andruw Jones no ta solamente un èks-hungadó di baseball. E ta e mucha di Brievengat ku a demostrá ku yu di un isla chikí por yega na mesun altura ku e grandinan di deporte mundial.

Den mi archivo mi a topa un artíkulo speshal di Beurs Magazine di yüni 1996, kaminda periodista a pinta un portrèt di un Andruw Jones di solamente 19 aña. Un mucha humilde, trankil i respetuoso, ku tur hende tabata yama “The Curaçao Kid.”

Ora mi lesa e artíkulo awor, 30 aña despues, mi no por evitá pensa: nan a mira futuro promé ku hopi hende.

Skout Giovanni Viceisza, un komersiante (direktor di Curacao Welding i Kas di Oferta) i amante di deporte i un persona ku stima su isla tabata hopi serka di Andruw Jones, i e persona ku tabatin masha bon kontakto ku John Schuerholz (1990–2007) general manager di Atlanta Braves. E amistat akí a resultá den un éksito pa Andruw i Atlanta a firma Andruw na 1994 na edat di 16 aña. E tempu ei Giovanni Viceisza a bisa un frase ku awor ta parse profétiko: “Andruw tin algu speshal.” No tabata papia solamente di su bate òf di su wante. E tabata papia di su karakter.

Viceisza ta deskribí Andruw komo un hòmber humilde, respetuoso, inteligente, ku no tabata gusta hopi publisidat. Un mucha ku ta papia ku tur hende manera igual i ku no a laga fama kambia ken el tabata. Esaki ta un lès pa hopi atleta di awe.

Den e mesun artíkulo por lesa ku ya na 1995 Andruw tabata pone poko sifra ekstraordinario den Minor League: 25 homerun, 100 RBI, 56 base robá i un temporada ku tabata hasi tur skout mira den un direkshon: Atlanta Braves. Andruw ta un hungadó kompleto, un “five tools player”. Esei kier men e tin spit, kore base bon, un bateadó averahe, power hitter i e tin un tremendo wante komo defensor.

Pero loke ta impreshoná mi mas no ta e sifranan. Ta e manera ku tur hende ku konosé tabata papia di su persona. Nan no a bisa: “e ta e mihó.” Nan a bisa:”e ta  un bon hende.” I talbes esei ta e logro mas grandi.

Di Brievengat pa Cooperstown

Tempu ku e artíkulo aki a sali, e periodista a skirbi ku Andruw probablemente lo yega “The Big Show”, Major League. Ni e periodista, ni e skout, ni Kòrsou mes por a imaginá ku e mucha ei lo bira un di e mihó centerfieldernan den historia di baseball.

Andruw Jones a gana 10 Gold Gloves konsekutivamente, a dal 434 homerun, a hunga 17 temporada den Major League Baseball i hopi eksperto ta konsider’é komo un di e mihó defensornan ku hamas deporte akí a mira. Te awe ta konsiderá su balor defensivo komo esun mas haltu pa un outfielder den historia di MLB.

Otro momento históriko pa Kòrsou

Dia 26 di yüli 2026 lo keda skirbí ku lèter di oro den historia di nos isla. Na Cooperstown, New York, Andruw Jones ofisialmente a drenta den Baseball Hall of Fame. No solamente komo un gran atleta. Sino komo e promé yu di Kòrsou ku a logra e honor ei.
Den su diskurso, Andruw no a papia solamente di su mes. El a gradisí su tata Henri Jones, su entrenadónan, su kompañeronan di Atlanta Braves i tambe e pionero Hensley “Bam Bam” Meulens, kende a habri kaminda pa e siguiente generashonnan di hungadó di Kòrsou. El a bisa ku e semper a spera inspirá muchanan di nos isla pa nan kere den nan soño. Esaki ta presis loke a sosodé.
Sin Andruw Jones, talbes nos lo no tabatin tantu mucha di Kòrsou den Major League manera awe.

E legado ta mas grandi ku baseball. Pa mi, e legado di Andruw no ta solamente den su homerunnan òf Gold Gloves. E ta den e speransa ku el a duna un  pueblo. Un isla di apénas 160 mil habitante a logra pone un di su yunan den e salòn di inmortalidat di deporte mas grandi di Amérika.

Esaki ta bisa tur mucha ku ta hunga na Brievengat, Suffisant, Santa Maria, Barber òf Soto: Bo no mester nase na New York, Los Angeles òf Atlanta pa bira un leyenda. Bo por nase na Kòrsou.

Ora mi mira e artíkulo di 1996, mi ta mira un mucha ku ainda no tabata sa ku su nòmber lo keda skirbí pa semper.

Ora mi mira e portrètnan di Cooperstown den 2026, mi ta mira e mesun mucha. Solamente ku awor e ta un hòmber ku a kumpli ku e promesa ku Kòrsou tabata mira den dje. Andruw Jones a drenta den Hall of Fame. Pero den kurason di hopi yu di Kòrsou, el a drenta hopi promé. I talbes e título di “The Curaçao Kid” lo ta e premio ku mas e ta apresiá. Pasobra, maske mundu kompletu awor ta yam’é Hall of Famer…Pa nos, e lo keda pa semper simplemente: e yu di Kòrsou.

Material usá: Beurs Magazine di yüni 1996 – kòmbersashon ku Cedric Kirindongo.