Tur pueblo mester por forma/produsí su propio trahadó konsagrá. Ku nos propio seminario, e ideal di bira saserdote ta bira mas real. (palabranan di pastor L. van Dijk na apertura di St. Pius seminario na aña 1955).
Ounke mester menshoná ku esaki no tabata e promé seminario na Kòrsou, ya ku na 1843 Mgr Niewindt a kuminsá un seminario na Barber, primeramente pa forma padernan hulandes. Aki 9 antiano a kuminsá nan formashon pa pader, pero ningun a kaba.
Na 1897 Òrdu di dominikano a akseptá e tarea di Papa, pa kuminsá i dirigí un seminario na Scherpenheuvel, pa motibu di nesesidat di pader na obispado di Venezuela. Den su buki “Geschiedenis van de R.K. Missie op de Nederlandse Antillen vanaf 1870” pader M.D Latour ta dediká algun página na e seminario di Scherpenheuvel. Mgr. Silva di Venezuela a pensa ku lo ta un bon idea pa habri un seminario na Kòrsou. Na 1898 e promé seminaristanan venezolano a yega Kòrsou. Riba 29 di mei 1898, Mgr. J.J.A. van Baars a konsagrá e úniko di e 21 studiantenan, Sr. Antonius Ellis komo pader na Scherpenheuvel. Tabata un satisfakshon pa famia Ellis, ya ku nan promé yu, Henri Ellis, algun siman promé di su konsagrashon a muri na seminario Rijzenburg, Hulanda.
Algun aña despues, pa motibu di turbulensia polítiko na Mérida e studiantenan a disidí di bolbe Venezuela. Aloménos esei tabata un parti di e motibu ku a duna pa a sera e seminario. Di otro banda tabatin vershonnan persistente ku obispu di Mérida no a haña basta sosten pa su plan pa habri e seminario akí na Kòrsou i laga estranheronan forma nan padernan. Sea komo sea, 27 di ougùstùs 1901, e seminaristanan a bandoná Scherpenheuvel, rumbo pa Maracaibo, riba e barku Zulia.
Kandidatonan pa bira pader tabata bai Hulanda òf Sur Amérika e tempu ei.
Dia promé di sèptèmber 1955 a habri seminario San Pio X, ku tabata karga nòmber di: Juvenaat San Pio X, un seminario ku mester a prepará hóbennan antiano haña oportunidat pa prepará segun un sistema religioso i sientífiko pa estudio superior di Santa Órden Saserdotal. E intenshon tabata pa hóbennan ku tabatin intenshon pa bira pader, pero no tin ningun obligashon pa bira pader di òrdu dominikano despues. Segun nan leinan di iglesia pa seminario, nan tabata pone un atenshon speshal religioso riba edukashon di e hóben, den sentido ku nan tabata trata di hasi di nan: hóbennan ku karakter i energia salú na alma i kurpa. Nan tabata purba ofresé e hóben mesun ambiente ku tin den kas di un bon famia katóliko.
Organisashon i intenshon.
E edukashon sientífiko ta konsistí di un klas di preparashon. Esaki ta pa muchanan di seminario ku maske a kaba klas seis di skol básiko, tòg ainda no tabata basta avansá pa sigui lès na Radulphus College. Muchanan di klas di preparashon ta bai di 7 klas na un mulo, por ehèmpel St. Ignatius College na Weis òf St. Thomas College na Otrobanda, unda nan ta haña lès speshal pa pasa èksamen pa bai Radulphus College. Despues di Pasku di Resurekshon e hóbennan akí tabata haña algun lès di latin na seminario, pa e idioma no resultá nan straño, ora ku nan tin di kuminsá ku latin di nobo den e promé klas di Radulphus College. Despues di e klas di preparashon, e seminaristanan tabata bai Radulphus College, pasobra Antia no tabatin un gimnasio i tabata deseo di Papa di Roma ku seminarista ta sigui un skol sekundario ofishal. Ora ku seminaristanan kaba e di dos klas di Radulphus College, nan ta sigui pa “C afdeling” ku tabata destiná pa formashon di maestro di skol. Pero ku si tin den nan ku tin talento pa matemátika, nan tabata bai “B afdeling”. Enseñansa na Radulphus College tabata masha importante pa iglesia katóliko, pasobra si e seminarista kambia di idea di no bira pader mas, e por sigui i kompletá su estudio sin ningun difikultat.
Despues di a optené su diploma di Radulphus College, e seminarista tin di dediká alomenos un aña na idioma klásiko na e pais unda e ta spera di hasi su estudio superior pa órden saserdotal.
Atmishon
E kandidato mester tin intenshon di bira pader. Sinembargo ningun mucha di entre 12 pa 14 aña, ningun maestro di skol, ningun pader, ningun mayor por ta sigur ku e kandidato ei lo alkansá e final di estudio. E kandidato mester trese: papel di bon kondukta pa pastor di parokia; papel di dòkter, ku ta deklará ku e mucha ta bon di salú i e por biba un bida den internat; papel di boutismo i konfirmashon i tambe papel di bieu.
Seminario San Pio
Seminario San Pio ta solamente pa esnan ku kier bira saserdote. E seminario tabata duna e hóbennan un edukashon formal i nesesario pa un futuro pader i kreando ambiente den kua vokashon saserdotal por krese. E seminario ku tabata situá den e edifisio kaminda ántes UTS tabata banda di Universidat di Kòrsou i awor den man di El Tributo F.D. Rooseveltweg 337, tabatin tur posibilidat, kamber, kushina, diferente kancha di deporte, lugá pa studia i resa i tambe espasio pa tuma lès di músika. Tabata pone masha atenshon na edukashon religioso di e hóben. Tur dia tabatin sakrifisio di misa, orashon mainta i anochi, rosario i adorashon, lòf etcetera. Tambe seminaristanan mester a asistí den dianan di retrèt spiritual i nan tabatin nan ora di lektura spiritual tambe.
Paña i otro kosnan nesesario
E hóbennan mester pèrkurá pa labamentu di nan paña i mayornan tabatin ku buska e pañanan pa laba nan. Hóbennan mester ta semper nèchi bistí. Hóbennan di otro islanan tabata manda nan pañanan ku Niagara bai laba na kas di nan mayornan. Mas aleu seminario tabata menshoná tambe, ku e hóben por a bin ku imágen òf prenchi di santu òf potrèt di famia. Krusifikado no tin mester, ya ku seminario mes tin esei.
Hóbennan tabata sigurá kontra aksidente i tur propiedat di e hóben (paña, buki etcetera) tabata sigurá kontra di kandela o daño kousá pa kandela.
No tabata permití di usa òf warda ningun buki, ku no tabata aprobá pa seminario. Seminario tabatin su propio biblioteka.
Humamentu tabata prohibí pa hóbennan menor di edat i esnan mayor di edat por a huma, pero na midi. Tabatin diferente pader ku tabata huma manera bapor.
Hóbennan por a haña bishita djadumingu for di 2or te 6or, pa evitá mas tantu posibel di stroba e hóben durante su oranan di estudio.
Mas aleu Seminario San Pio X ta bisa, “ku nan ta forma hóbennan pa bira despues bon saserdote. Ku bista riba esei ta bon ku for di tempran, esta den nan hubentut kaba, e hóbennan siña deskustumbrá i apstené nan den dibertishon”. Durante dianan di fakansi e hóbennan tabata kompletamente den man di mayornan i seminario ta pidi pa wak ku e hóbennan no bishitá lugánan, unda nan vokashon ta kore peliger. Mayornan mester tin kontrol riba tur kos ku hóbennan ta hasi den fakansi. I klaro ku un hóben ku kier bira pader, di su mes lo bai misa tur dia, risibí santa komunion frekuentemente, resa su rosario regularmente den fakansi. I por último den fakansi e seminarista mester bai kuminda pastor durante e promé dianan di su fakansi i nan tin di hasi meskos promé di bolbe seminario.
Gastu di estudio
Seminaristanan tabata paga 95 florin pa luna i plaka di tantu St. Ignatius komo Radulphus College tabata apart. Si mayornan tabata kier pa e mucha haña lès di fio, piano òf kual kier otro instrumènt, mester a paga esaki apart. Mester a hasi tur pagamentu na seminario mes òf riba kuenta St. Pius Seminarie na Hollandse Bank Unie.