Den mi programa Doming’i Pleizí, mi a rekordá pianista yu di Kòrsou Celsio Pietersz, tokando algun piesa di La Perfecta. Un di e piesanan tabata Ban Basilá i den e piesa akí Nildo Martis ta kanta tokante temporada ku CB (Citizen Band Radio) tabatin Kòrsou den su gara. I mesora a nase e idea pa skirbi algu tokante tempu ku mi a kaba di yega bèk for di Hulanda i CB tabata mashá popular

“Brake Brake Argentina, aki ku Kòrsou Antia Hulandes, bo por kopia mi Argentina? Si bo por kopia mi, duna mi un 10-4” (bisa mi ta oké). Ta sigui un bos ku ta bisa mi, esaki ta Tango (T) Alfa (A) 24 di Argentina, kopiando Curazao Antia Hulandes 100 porshento”. Asina nos kòmbersashon tabata kuminsá i nos tabata interkambiá informashon di e dos paisnan i ta primintí otro, dos deskonosí, ku nos lo skirbi otro. Asina nos dia, nochi tabata bai, tratando ku bo CB di drenta den kontakto ku rònt mundu. E tabata yena bo ku satisfakshon i bo por a pinta riba e mapa di mundu ku tabata pegá na muraya, ku bo a hasi kontakto ku un pais mas.

Den mas o ménos 1976 CB (Citizen Band Radio) a subi merkado di Kòrsou na kantidat basta grandi. Na promé instante tabata hendenan ku un tiki moda ku a kuminsá hasi uso di e aparato aki. Tabatin dos sistema, un ku bo por a instalá den bo outo i e otro tabata un “base station” ku bo por a pone na bo kas. Preis tabata regular dependiendo di tipo di aparato i asesorio ku bo por a pone aserka, hasiendo bo instalashon mes karu ku bo tabata kier.

Mi a kòmbersá ku diferente afisionado di CB na Kòrsou i Boneiru i tambe ku  diferente hende ku tabata traha e tempu ei na Landsradio. Den korant Èkstra di 17 di mart 1980 edishon Boneiru mi a lesa di un interkambio ku tabatin entre Klup Dividivi Internashonal i Merengue Internashonal DX di Repúblika Dominikana. Na e okashon ei Merengue Internashonal a nombra Crismo Bernabela, su call name tabata Malibu, komo nan representante na Boneiru.

Niki Tromp tabata e motor tras di e movementu di CB na Boneiru, ku a kuminsá den Klup di Prensa Boneriano. CB tabata ilegal na tur isla di Antia. Algun nòmber (call name) di Boneiru e tempu ei tabata: Black Beauty, Libertat, Brother, Teremoto i Black. Sr Rudi Ellis e tempu ei tambe tabata un afisionado di CB i a purba pa legalisá uso di CB, pero enbano.

Mi ta kere ku pa esnan ku no tabata den e mundu di CB, e loke mas tabata hala atenshon tabata e idioma di CB. Ora bo ta pidi atenshon esei tabata: Brake Brake, i kontesta tabata: Shoot Braker, ten four (10-4), esaki kier men oké; negatori, bo ta kòpi mi; okapa, ban den friu, loke kier men ban den frekuensia mas altu; tin hende tras di kortina, loke kier men tin hende ta skucha nos kòmbersashon; Duna mi bo 10-20 (unda bo ta?; ròger (oké).

Mayoria usuario di CB, tabatin nan instalashon den nan outo i otro nan tabatin esaki komo “base station” na nan kas. Ami, Pepin, tabatin di mi na kas. Nos tabata importá e aparatonan fásil akí na Kòrsou i asta tabatin negoshi (Radio Shack) ku tabata bende e aparatonan habri den nan negoshi. Realistick, Cobra, Nakamichi, tabata marka konosí serka nos hendenan.

Problema a kuminsá, ora ku usuarionan a kuminsá modernisá nan ekipo mas i mas, hasiendo nan ekipo mas moderno, mas pisá, tresiendo problema den bario i tambe pa servisionan vital di nos isla. Polis a kuminsá haña problema ku tabata skucha nan, brantwer, radio emisora i ambulans tabata haña interferensia i den bario ora sende e aparato i drenta den kontakto riba frekuensia, televishonnan den besindario tabata stòp di funshoná. Na Boneiru por ehèmpel, simpatisantenan di sierto partido tabata bai den besindario di Radio Hoyer 3 na momento ku sierto partido tabatin programa i nan tabata “kim nan mike” sende nan mike, strobando e programa ku tabata den aire i mas ainda habri nan mike i drenta den programa, papiando barbaridat.

Pero banda di esaki tabatin hopi kos bon, ku e grupo di CB tabata hasi tambe; intervení na momentu di kalamidat, por ehèmpel temblor na México; kaminda na Venezuela tabatin nesesidat di sierto remedi; kaminda tabatin mester di polis i asina tabatin mas momentu di asistensia. Mester bisa tambe, ku parti turístiko a probechá bon di e hype di CB, pasobra atraves di e sistema akí basta hende a konosé Antia.

Bo por relatá e temporada aki masha bon mes, pasobra e calling names (nòmbernan) ku tabata usa tabata di e tempu ei, manera: Gromyko – Sha di Iran – Amin, pero klaro ku tabatin mas nòmber, asina Helmin Wiels su calling name tabata Estacion Genesis i su ruman Aubert tabata Cougar base station; Cherry Bomb – Jolly Boy, Pinocho, Pepin, Big John – Delta – Frankenstein -Topogigio-Black Sugar Boy – Black Eagle – Barabas – Ten Zero – Lobster – R2D2- Dushi Dushi Angel – Bòns Bòns – Fomoko – Karamèlè – Only Woman – Foxy Lady – Big Ben.

Bo por bisa ku den kuminsamentu di dékada 80, pa motibu di e yagmentu riba CB dor di gobièrnu, CB a kuminsá pèrdè tereno i ku yegada di selular el a bin kaba na nada. Tabatin algun afisionado ku a bira radio amatùr. Na 2023 e klup di radio amatùr tabatin mas o ménos 75 miembro.

Despues ku mi a puntra riba FaceBook tokante CB, algun persona a bai saka i instalá nan CB atrobe. Mi no ta spera ku gobièrnu bai sensura mi blòg.