Pa promé biaha ku e palabra jazz a kai den prensa aki na Kòrsou, ta data di novèmber 1928, ora ku na “Badplaats Vista Alegre”Jan Thiel un Jazz-Band a toka, organisá pa C.A. Perret Gentil.

Den ougùstùs 2024 nos ta selebrá di 10 aña di Curacao North Sea Jazz Festival (CNSJ) na Kòrsou. Pa straño ku ta parse mayoria di artista den e festival aki ta kai den otro género di músika i no Jazz. Den pasado esaki tabata otro, ora ku Kòrsou sí tabata risibí artista di jazz, ku tabata partisipá na diferente festival ku tabatin na Kòrsou.

Pioneronan den  “jazz scene” di Kòrsou tabata Angel Salsbach, Edsel Provence, Jacques Rojer, Rob De Lannooy i John James Willekes, ku a kuminsá ku moveshon den mundu di Jazz.
Final di dékada 40, Radio CUROM  tabatin programa di Jazz i Jacques Royer tabatin programa di Jazz (Jazz Society) den añanan 59 i 60 na CUROM. Ced Ride, Dudley (Ross) Rosario, Cesar Palacios i Trevor Nisbeth a sigui despues host e programa di jazz na CUROM. Na Radio Kòrsou FM, Michael Arvelo tambe tabatin un programa di Jazz. Durante 10 aña (1987 – 1997) Rob De Lannoy, huntu ku Jacques Royer i John James Willekes tabatin un programa na Radio Hoyer II, “Jazz a Tazz” ku despues a kambia nòmber i bira “Round Midnight” (un komposishon di Thelonious Monk).

Jacques Rojer, Rob De Lannooy i John James Willekes

Jacques Royer for di su temporada di Radulphus College tabata skibi den e korant di skol “Spectator” tokante jazz. Jacques Royer via di su programa na radio a sigui motivá nos hendenan den mundu di jazz i poko poko su interes pa tin su propio klup di jazz tabata bai kresiendo. Aki na Kòrsou nos tabatin Salsbach Jazz Trio i na  Fort Waakzaamheid tabata toka Jazz grabá i live.

Na 1986 Jacques Royer ta habri su klup dilanti di Centrum Supermarket den Mahaai i ta yama su klup Jazz Forum Café “Blue Note”. Un lugá kaminda den kuminsamentu bo por a sinta i skucha jazz grabá i despues tokadónan di jazz a kuminsá bishita Blue Note i nan tabata improvisá (jam). Den tempu rèkert e lugá a bira masha konosí i djárason tabata anochi di muzik live den Blue Note. Nota positivo di Blue Note tabata, ku bo a haña diferente músiko di jazz grandi (Red Rodney, e kubano Bobby Carcasses i otronan) ku a drenta jam un ratu ku nos músikonan lokal.

Asina aki tambe e interes pa género di jazz a kuminsá krese riba nos isla i a lanta idea pa organisá un festival chikí na Kòrsou. Un sorto di latin, Caribbean Jazz Festival.

Asina nos a kuminsá na Kòrsou for di 1986 te 2008 (ku eksepshon di 2007) tur aña ku un festival ku super artistanan internashonal i lokal. E festival a tuma lugá na diferente lokalidat: Brakkeput Mei Mei – Landhuis Brievengat – De Tempel – Nubia – Coney Islands – The Blue Note – Olé Olé – Freewinds – Birdland Waves den Punda – Sentro Pro Arte – Mambo Beach – International Trade Center – Festival Center i lugá di Parker Renaissance Hotel .Tur aña e organisashon tabatin su retonan i e problema di mas grandi tabata e sèn pa paga artistanan. Tabatin tempu ku gobièrnu tabata duna supsidio i tabatin algun empresa privá ku tabata yuda finansieramente. Un temporada di 2 pa 3 aña KLM (Holland Jazz Festival) a djòin e organisashon i huntu a organisá e evento di jazz.

Un selekshon tòp a bishitá Kòrsou durante e 20 edishonnan di Jazz ku tabatin na Kòrsou, organisá pa Curacao International Jazz Foundation – International Jazz Foundation – Caribbean Jazz Foundation – i Jazz Island Promotion. Ata un lista di artista di jazz ku a bishitá Kòrsou: Red Rodney – Salsbach jazz trio & Bibi Provence- Roy Louis band- Felix Walroud/Cedric Dandaré/Eric Calmes/Rudy Emerenciana-Lito Scarso’s sound-Delbert Bernabela quartet-Anastacia Larmonie sextet-Dave Mathews group- John Willekes & jazz expression -Igor Atalita & company -Monty Alexander trio – Paquito d’Rivera & Havana-New york ensemble – Gonzalo Micó quartet- Latin Vice -Aruba Caracas express -Adrian Clarke quartet -Andy Narell group -Uti Gregorio and the Caribbean jazz ensemble – Nancy Janosan trio – Irakere -Dave Valentin quintet -Big Band Cornelia -the Harper Brothers – Nestor Torres Quintet – Original New Orleans Tuxedo jazz band – Claudio Roditi sextet- Eddie Palmieri orchestra -La Sonora Ponceña- Charlie Sepúlveda-Tania Maria-George Benson – Spyro Gyra-Hershel and his Curaçao Jazz- Najee- Ray Baretto- Dianne Reeves-Mark Whitfield-Walter Wout & Company-Duke Ellington Orchestra- Wind & Keys- Michel Camilo- Arturo Sandoval-Danilo Perez- Earl Klugh- Maceo Parker & Candy Dulfer- Blood, Sweat & Tears- Rudy Emerenciana & the Tropical Jazz Band- Biella Da Costa- Al Jarreau- Caribbean jazz project- Yuchi Córdoba & Grupo Limania- Curaçao Jazz Hot- Dee Dee Bridgewater- Tropijazz all stars-Flora  Purim & Airto -Take 6- The Yellow Jackets- Steve Turré- the Dirty Dozen- Grupo Zamanakitoki- Roberto Pereira – Maruja Bogaard – Worlds of Guitar -Glenn Steel Jazz- the Latin Jazz Crew- Luis Salinas- Ingrid Jensen- the Bronx Horns- Grupo Serenada- Vanessa Rubin- Cubarama- Arnell- David Sanchez-Blues Latino & Jazz – the Auratones -Marlon Conradus @ the Rhydm Headquarters-Gonzalo Rubalcaba trio- Imani- Randal Corsen & Cross Currents-Jerry Gonzalez & the Fort Apache Band- The JJ Rojer Quartet- Jibaro Jazz-Izaline Calister- Saskia Laroo- Cuban Marquise- CCC Orchestra- Izline Calister Youth Concert- Tambu-Jazz- Tobey Foyeh & Orchestra Africa- Pierre Dunker and Expedition II- The Dave Weckl Band=Ivan Jansen & the Caribbean Jazz Ensemble- The Toots Thielemans Quartet- Ernest Ranglin- The CCC Orchestra/Alex Brown/Manuelito Lara- Gedion Chacdler’s Jazz Expression- Franklin Rubiano Quartet- Trio Fattoruso- Russ Henry & Flinting- Konkie Helmeyer & Riba Tera- Pernell Saturnino- El Eco with Guillermo Nojechowicz- Jon Faddis- No Man’s Land- Richard Bona- CoCo GreGre (Gregory Colina)- Carlos Oliva & los Sobrinos de Juez. Manera bo por lesa, un lista impreshonante di artista di jazz, lokal i internashonal.

Pa diferente aña mi a traha komo MC na e festivalnan i te na ora mi no a MC, mi tabata enbolbí den transmishon di e festival òf parti di e festival. E públiko ku tabata akudí, tabata un públiko selekto, kada biaha mesun hendenan, ku ta esnan amante di e género jazz.
Na 1990 Irakere di Cuba a duna ke se yama un aktuashon den Sentro Pro Arte, ku a pone tur hende ariba bou i ku mester a move Irakere siguiente dia pa Curacao Festival Center, Un dje promé biaha nan ku mi a mira Sentro Pro Arte swing i ku hende riba pia, bailando den tur skina di Sentro Pro Arte, riba ritmo di Irakere.

Ningun di e festivalnan akí tabata evento ku realmente a gana plaka, algun biaha a “break even” pero realmente gana plaka nò.

Blue Note a disparsé i Birdland den Punda tabatei un ratu. E lugá ku mas tempu a dura ku su ambiente di jazz tabata Olé Olé den Saliña di Fito Roman, ku tambe a trese un kantidat di artista internashonal, pero na promé lugá tabata un bon plataforma pa músikonan lokal. Meskos tabata i te ainda ta e kaso, di Blues di Avila Hotel, ku tur djaweps tin aktuashon di banda lokal i ku tambe tin e espasio ku Olé Olé, i Blue Note tabata brinda, esta ku artistanan por subi stage i jam ku e banda.

E barku Free Winds tambe a kontribuí grandemente ku nos “jazz scene” i na diferente okashon tabatin artista i bandanan internashonal abordo i ku fanátikonan di jazz di Kòrsou por a bishita e konsiertonan akí. Tambe na diferente okashon tabatin fundraising a bordo di Free Winds pa organisashonnan karitativo di Kòrsou na kua evento nos artistanan lokal tabata partisipá i kooperá grandemente.

“Skohe bo plato, skohe bo Jazz’ tabata un programa na radio CUROM, kaminda riba djárason tabata invitá un grupo di hende bin kushiná nan plato preferí i tambe toka nan piesa/artistanan di jazz preferí. Un programa ku a gosa di un sintonia grandi, presentá pa Yves Cooper.
https://www.facebook.com/rudy.haakmat/videos/121467107865520

Otro aktividatnan mashá eksitoso ku e fundashonnan ariba menshoná a organisá, tabata charlanan tokante e mundu di jazz, tantu dirigí pa nos propio hende manera Angel Salsbach, komo pa periodista farandulero di taya internashonal, manera Lee Mergner di e prestigioso revista di Jazz, Jazz Time, Max Salazar di Latin Beat i e konosido Paul Acket, dirigente di promé ora di North Sea Jazz Festival di Hulanda, ku por sierto a yuda lanta Curacao International Jazz Foundation.

Tambe na diferente okashon nan a organisá tayer pa nos hóbennan en kombinashon ku “Centro Cultural Curacao”(CCC). Esaki a resultá tambe, ku e grupo di músiko hóben di CCC a partisipá na e festivalnan tambe.

Ainda nos ta haña konsierto di jazz de bes en kuando, pero nan a bira ménos awor, den CNSJ tin artista di Jazz ta partisipá, pero e asento ta riba otro artista grandi di otro género. Hopi tabata esnan ku tabata kere den género di músika aki i ta bon tòg pa menshoná nòmber, sperando ku mi no ta lubidá nòmber: Jacques Rojer – Rob de Lannoy – John James Willekes i su kasá Monifa – Richard de Windt – Fito Roman – Vanessa Tore – Jamila Romero – Dudley Rosario – Walter Wout – Frans Heiligers- Venancio Gomez – Ed Nahar – Stanley Betrian – Willem da Costa Gomez – Ramon Penso – Winto Samson – Mike Balentina – Allan Chatlein – Trevor Nisbeth. Kere mi ku tur e hendenan akí a hasi e trabou “por el amor al arte” i mi sa asta di un par di nan ku a hinka nan propio sèn den e aventura di festival di jazz. Simplemente e festival aki no tabata deha, pa motibu di un grupo chikí ku realmente tabata i te ainda ta amante di jazz.