Jack Novela 
(Philip A. Rademaker)

Poko dia ei ku m’a bai bishitá Manchi mi tio den Nos Lanternu, hiba su pak’i sigaria p’e, m’a mira Jack Novela sintá den un stul di wil te den skina pariba dje veranda. Ta basta tempu kaba ku m’a pèrd’é fo’i bista te ku m’a lubidá mes riba dje. Anto ta hende ku mi tabata gusta kòmbersá kuné pa mi tend’é splika su asuntunan. Ei bo ta mira, no, kon buèlta di bida ta hiba ku trese. Ma mi n’ pèrdè pa gana. Mesora m’a probechá bai kumind’é, pa mi mira si ainda el a keda ku su mesun maña straño.

Mi n’ sa si bo ta kòrda tempu ku nan tabata pasa novela na radio, promé ku Nacho Moron a pone televishon tra’i porta di glas di su pakus den kaya grandi di Otrobanda pa anochi hende bin para riba asera mira Radio Caracas Televisión. E tempu ei ta den tur kas tabatin ku sinta rònt di radio pa skucha sufrimentu di Albertico Limonta den “El derecho de nacer”, gosa di heroismo di “Kadir el árabe” òf kremp di spantu ora pasa di Shon May Henriquez  “E pia di makaku”. Ai djo. M’a hera di lubidá riba Jacques Penso ku Nydia Ecury ku tabata pone hende hari te kai for di nan stul den “Kadi ku Pe”. E tempu ei tur novela, ademas di e aktornan ku ta papia, tabatin un persona ku tin ku produsí e zonidonan. Ta su trabou pa uza pida pida palu, bleki, kaha di karton i bòter bashí pa bo tende bientu supla huuuu, porta habri kíñèèè, skòpèt tira BÈW, glas kai kibra chínguilin i klòk bati bèlèn-bèlèn.

Anto asina Jack Novela a bin haña su nòmber di kariño. Na kas ta Shakitu nan tabata yam’é. Mi kièr sa ku ta Isaac e yama ofisialmente, Shaki òf Shakitu na kas, anto komo e tabata hende ku ta gusta konta su amigunan ku mashá entusiasmo historia di e sinenan ku el a mira uzando mashá ekspreshon merikanu, nan a kuminsá yam’é Jack na lugá di Shaki.

Awèl, Jack akí tabata papia manera novela. Sea ta bou di influensha di radio, òf kisas di su pelíkulanan faborito di Hopalong Cassidy, Roy Rogers i Gene Autrey, e gran kòbòinan merikanu ku sombré blanku ku no ta susha nunka, ku e no por a falta nan aventuranan ningun djadumingu atardi den teatro West End, el a kria e kustumber di enrikesé su kòmbersashon ku efekto di zonido. Ta mashá normal pa ora e topabu riba Brionplein despues di sine, e konfrontabu mesora ku: “Palu, b’a pèrdè, hòmbu. Bo mester a mira kon Roy Rogers a kore yega riba su kabai PÁTAKAPÁTAKAPÁTAKA, SHA-SHA bul’abou, HI-GAKS e bandidu un moketa BADAM mand’é tera. Ma PRÁ esei a bula lanta mesora WAÑAP saka su kuchú. Ma ZA-ZA Roy Rogers a saka su rebòlbu BADAM BIDIM hul e dos bala, BRÁ, na suela mesora, bru!”

Ku e rekuerdonan di violensha alegre ei den mi mente m’a yega para su dilanti. El a keda mirami manera e n’ por a bini bei ta ken. Mi di kuné; “Ta kiko, Jack. Ta stre’i nòrt b’a pèrdè ku bo n’ ta rekonosé bo muchanan di Seru?” El a sera su frenta, kinipí wowo pa fiha mihó, kaba e di: “Mir’akí, mucha sanka sushi, si n’ ta pasobra mi wesunan a bira ta zona KRA KRA, lo m’a lanta planta e moketa akí BU den bo frenta pa bo siña respetá hende grandi”. Mi dia a drecha. M’a lubidá ku ta serka Manchi m’a bini. “Ékolekua! T’asina ta mi amigu Jack Novela. Kon ta ku bida aki den. Nan sa pasa pelíkula di kòbòi pa boso mira?” “Ka kòbòi ki dònder”, el a kontestá. “Nan ta hisami ponemi BADAM den e stul akí, bira lomba FUIIIT bai lagami. Úniko kos interesante den e lugá akí ta ora nan TILIN TILIN TILIN pa anunsiá ku kuminda ta kla. Mare mi por haña un motor pa mi VRUM VRUM k’e stul di wil akí yega promé k’e bieunan sinbèrgwensa mort’i hamber ku tin aki den. TA-TA-TA-TA nan ta kore yega PÁNGALAN kue e tayó mas yen. Ban mira. Hasi bo mes útil bo rèk man kue e glas di djus riba mesa ei pa mi GLU-GLU beb’é promé k’e muhé mahos na blanku ei hasi BRAGADAM his’é bai kuné. HÚ! Hende por tin mal fashi asin’ei? Anto e tin un aw’i hole barata ta uza ku ta ponemi kada be HACHIN HACHIN ta nister.”

Den mi mes m’a pensa: “E stail por a keda meskos. Ma e tópiko sí a kambia”. Mi di kuné: “Mi t’ei lagabu, Jack. Mi tin Manchi su sigaria ku m’a trese p’e.” “Ai sí”, el a kontestá, “Dun’é nan p’e keda FU FU FU manda huma stinki riba hende aki den pone tur hende ta KÒHÒN KÒHÒN ta tosa”.M’a hui. M’a keda kontentu di topa Jack atrobe. Ma ei mes m’a sinti ku mi tempu di skucha novela bieu a pasa.