Barika Yen Kurason kontentu
Kerido Lektor
Lagami kuminsa na bisa ku ami no sa ferkuentá Snèk, si no ta riba kaminda mi ta i ku mi mester buska algu di freska. Esaki mes ta sosodé masha poko.Pero un bon amigu di mi tin komo kustumber, ku e ta frekuentá diferente snèk, den kompania di amigu i e ta kontami tur sorto di historia di snèk i tambe di e klientela di snèk.
Mi ta impreshoná pa e nòmbernan ku e lugánan akí ta karga: No me Olvides, His’é But’é, Papa ku Pèchi i hopi otro nòmber mas. Nan ta situá rònt Kòrsou i tin biaha pegá riba otro.
Mi a yega di partisipá na un trep bishitando diferente snèk di band’ariba i a hari mi barika yen ku e diferente nòmbernan i tambe e ddiferente doñonan di snèk.
Snèk, un luga pa lora man, pa haña un entrada, pa por topa hende, pa por topa bo partner pa un òf mas anochi. Straño ku ta parse, historia di e fenómeno snèk no ta ningun kaminda dokumentá,salvo e buki di Herman van Bergen i otronan i tambe un buki chikirititu asina di Segundo DeMei.
Via korantnan bieu mi por a haña algun informashon, no mashá, tokante nos snèknan, pero ta kasi tur siman tin snèk ta bin aserka. Falta basta dato konkreto i informashon i mi sa ku tin hende aki na Kòrsou, ku ainda tin muchu mas informashon, potrèt i/òf dokumento di e snèknan aki. Hendenan ku konosé otronan ku por tin informashon i tambe di personanan ku a traha den snèk; hendenan ku a biba den besindario di snèk, hendenan ku tabata traha den gobièrnu (GGD i brantwer) i ku mester a kontrolá e lugánan akí i hendenan ku doño òf famia di doño di snèk.
Lo mi bai na kompartí informashon ku bo(so) atrabes di mi blog “Hòrta Shòrt”, un tèrminologia ku ta usa ántes den presentashon di sine aki na Kòrsou na momentu ku durante presentashon di e pelíkula, nan saka un pida afó. Nos lo bin bèk mas den ekstenso riba e fenómeno akí.
Gustosamente mi ke drenta den kontakto ku e hendenan aki òf ku abo ku ta disponé di informashon tokante nos snèk, potrèt òf otro informashon di nos snèknan. Mi kier a pidibo, si bo tin informashon òf bo konosé hende ku tin informashon ku por yuda mi den mi empeño pa kolektá mas tantu dato konkreto i relevante posibel, fabor mail mi na info@percypinedoblog.com òf yamami na 510-4946. Pa tiki ku e informashon por ta, mi lo apresiá bo tuma kontakto ku mi. Di antemano masha danki.
Percy Pinedo
